Steinbaum: Specialja s’duhej të ngrihej, UÇK-ja u dënua më rëndë

Ish-zyrtari amerikan Jason Steinbaum ka thënë se Kosova nuk duhej të themelonte Gjykatën Speciale, duke komentuar dënimin me 81 vjet burg për katër ish-krerët e UÇK-së. Në një lidhje për Euronews Albania, ai u shpreh se gjykata nuk i ka shqyrtuar si duhet provat.

Sipas tij, që nga themelimi i saj, u kuptua se ajo nuk po shkonte drejt atyre që kryen krime, por kishte si cak liderët e UÇK-së. Steinbaum tha se procesi mund të ishte trajtuar nga sistemi gjyqësor i Kosovës, duke treguar besim te institucionet e saj.

Ai shtoi se gjykata mund të kishte ndjekur edhe serbët që kryen pjesën dërmuese të krimeve gjatë luftës në Kosovë, por duke mos e bërë këtë, njerëzit arrijnë në përfundimin se ajo kishte për qëllim dënimin e ish-krerëve të UÇK-së.

Steinbaum shprehu shpresën se shkalla e Apelit do të provojë se aktgjykimi dënues ishte i gabuar, duke theksuar se mbrojtja duhet ta ngrejë këtë çështje dhe se gjyqtarët në apel mund të thonë se provat nuk u shqyrtuan si duhet.