Meçe: Heqja e shqipes në Tabanoc cenon stabilitetin e rajonit
Analisti akuzoi koalicionin VLEN si bashkëshoqëruese në këtë veprim dhe kritikoi heshtjen e partive shqiptare në qeveri.
TIRANË — Analisti shqiptar Arben Meçe deklaroi se heqja e mbishkrimit në gjuhën shqipe nga tabela e mirëseardhjes në pikën kufitare të Tabanocit cenon stabilitetin e rajonit. Sipas tij, ky veprim nuk është i rastësishëm, por përbën një sinjal shqetësues për pozitën dhe të drejtat e shqiptarëve në Maqedoninë e Veriut.
Në një intervistë për emisionin televiziv „Tirana Live” në ABC News, Meçe kritikoi ashpër sjelljen e partive politike shqiptare që janë pjesë e qeverisë në Shkup. Ai theksoi se veprimi i qeverisë maqedonase për largimin e tabelave në shqip ishte i pritshëm, duke pasur parasysh qëndrimet e tyre politike.
Sipas analistit, shqetësimi më i madh nuk lidhet vetëm me heqjen e simboleve, por me mungesën e reagimit nga partnerët e koalicionit. Ai akuzoi partinë shqiptare VLEN se po shërben si një bashkëshoqëruese në këtë proces, i cili ka nxitur reagime pasi u raportua se gjuha shqipe po hiqet nga tabelat kufitare në Tabanoc.
Meçe shtoi se tensionimi i situatës politike ndikon negativisht në turizëm dhe ekonomi. Ai paralajmëroi se Maqedonia e Veriut mbetet një nga pikat më kritike për stabilitetin në rajon, ku turizmi po përdoret tashmë si një instrument proteste.
Burim: Gazeta Tema
— Redaksia ZHURMA
