ISHP: Rastet e sëmundjeve ngjitëse në Maqedoninë e Veriut janë rritur me 22 për qind

Gjatë muajit shtator, në Maqedoninë e Veriut janë regjistruar 1.042 raste të sëmundjeve akute ngjitëse, çka përbën një rritje prej 22 për qind krahasuar me të njëjtën periudhë të vitit të kaluar. Instituti i Shëndetit Publik bëri me dije se enterokolitët përbëjnë numrin më të madh të të prekurve me 694 raste, ndërsa janë evidentuar edhe 123 persona me linë e dhenve.

Sipas Institutit të Shëndetit Publik, shqetësim të veçantë paraqesin ethet e Nilit Perëndimor, ku gjatë shtatorit u konfirmuan 16 raste dhe katër persona humbën jetën. Ndërkohë, rikthimi i fëmijëve në shkolla dhe kopshte ka nxitur rritjen e kontrolleve ambulatore për infeksione të rrugëve të frymëmarrjes në Klinikën Universitare për Sëmundje të Fëmijëve “Kozle”. Po ashtu, gjatë muajit të kaluar u regjistruan 12 raste të reja me COVID-19 pa asnjë vdekje, si dhe pesë raste të hepatitit B dhe katër të kollës së mirë, të gjitha në Shkup. Kryeqyteti evidentoi numrin më të lartë të të sëmurëve me 385 raste gjithsej, ndërsa incidenca më e lartë u shënua në Shtip.

Lidhur me situatën te fëmijët, dr. Filip Doksimovski nga Klinika Universitare për Sëmundje të Fëmijëve “Kozle” sqaroi se në këtë institucion nuk ka asnjë rast të izoluar të gripit dhe se numri i pacientëve ditorë e i të hospitalizuarve është i pritshëm për vjeshtën. Për sa i përket vaksinimit sezonal, Instituti i Shëndetit Publik njoftoi se procesi po vazhdon përmes sistemit “Termini Im”, me interesim më të madh nga personat mbi 65 vjeç dhe të sëmurët kronikë, ndërsa deri tani janë konfirmuar dy raste të gripit të tipit A dhe 65 raste me simptoma të ngjashme pa konfirmim laboratorik. Gjithashtu, gjatë shtatorit u raportuan tetë raste të reja me HIV/AIDS dhe dy vdekje, duke e çuar numrin e rasteve në 49 për vitin 2026 dhe në 778 prej vitit 1987, nga të cilët 144 kanë ndërruar jetë, 520 jetojnë me këtë diagnozë dhe 114 konsiderohen të humbur për ndjekje.

Autoritetet shëndetësore njoftuan se pritet të mbërrijë dërgesa e vaksinave japoneze kundër tuberkulozit, pas ndërprerjes së përdorimit të vaksinave bullgare për shkak të dyshimeve mbi cilësinë e tyre. Zyrtarët u bëjnë thirrje qytetarëve të lajnë duart, të ajrosin ambientet dhe të shmangin kontaktet e afërta me personat e sëmurë.

«Për momentin nuk kemi asnjë rast të izoluar të gripit. Numri i pacientëve që kemi brenda 24 orëve, si dhe numri i fëmijëve të hospitalizuar, janë të pritshëm për këtë periudhë. Krahasuar me muajt e verës dhe fillimin e shtatorit, numri është rritur, por kjo nuk është diçka e papritur, duke pasur parasysh ardhjen e vjeshtës dhe kthimin e fëmijëve në kolektive», deklaroi dr. Filip Doksimovski.

«Deri më 30 shtator 2026, numri i përgjithshëm i rasteve të raportuara me HIV/AIDS gjatë vitit 2026 është 49. Ndërsa numri kumulativ i personave të regjistruar me HIV/AIDS në Maqedoni, për periudhën 1987–2026, është 778. Prej tyre, 144 persona kanë ndërruar jetë, 520 jetojnë me HIV/AIDS, ndërsa 114 persona konsiderohen të humbur për ndjekje, përfshirë personat që janë shpërngulur», njoftojnë nga Instituti i Shëndetit Publik.