Ish-kreu i Kadastrës së Fierit dërgohet me urgjencë në spital pas arrestimit

FIER — Drejtori i Spitalit Rajonal të Fierit, Arben Voja, është dërguar me urgjencë në ambientet e spitalit që drejtonte pasi ka shfaqur probleme kardiake pas arrestimit nga policia. Voja u ndalua pas hetimeve të Prokurorisë së Fierit mbi tjetërsimin e 44 mijë metrave katrorë tokë shtetërore në zonën e Povelçës. Aktualisht ai ndodhet nën kujdesin e mjekëve dhe nën ruajtjen e efektivëve të policisë.

Ngjarja vjen menjëherë pas ekzekutimit të masës së sigurisë ndaj tij dhe zyrtarëve të tjerë lokalë. Hetimet e organit të akuzës kanë lidhje me kohën kur Voja drejtonte Kadastrën e Fierit. Zyrtari është përballur edhe më parë me procedime ligjore nga organet e drejtësisë. Në dhjetor të vitit 2025, Prokuroria e Fierit dërgoi për gjykim një çështje ku ai dhe gjashtë punonjës akuzoheshin për shpërdorim detyre lidhur me lejet mjedisore gjatë kohës që drejtonte Agjencinë e Mjedisit dhe Kadastrën. Gjithashtu, në maj të vitit 2023, Agjencia shtetërore e Kadastrës në Tiranë e pati kallëzuar atë në SPAK bashkë me specialisten Shpresa Gjikondaj për falsifikim dhe shpërdorim detyre me një dëm financiar prej 9.5 milionë lekësh të reja.

Sipas burimeve nga Komisariati i Policisë Fier, Voja ka shfaqur shqetësime në zemër rreth orës 19:00, çka solli transportimin e tij të menjëhershëm drejt urgjencës. Burime policore bëjnë me dije se ish-drejtori i Kadastrës ndodhet nën kujdesin e bluzave të bardha, ndërsa jashtë dhomës ku po merr ndihmën mjekësore është vendosur një patrullë për të garantuar sigurinë. Po ashtu, burimet sqarojnë se familjarëve të tij nuk u është lejuar hyrja apo takimi me të arrestuarin gjatë qëndrimit në spital.

Sipas hetimeve të prokurorisë, sipërfaqja prej 44 mijë metrash katrorë tokë shtetërore është kaluar në pronësi private përmes dokumenteve të falsifikuara me qëllim përfitimin financiar. Më pas, kjo sipërfaqe i është shitur investitorit Halil Gashi për ndërtimin e një parku fotovoltaik. Organi i akuzës ka vendosur sekuestro mbi tokën e regjistruar në emër të Gashit, ndërsa investitori nuk është marrë nën hetim sepse dyshohet se nuk kishte dijeni për shkeljet administrative.

Në kuadër të të njëjtit procedim penal, masa e sigurisë «arrest në burg» është ekzekutuar ndaj ish-kreut të Njësisë Administrative Dërmenas, Dilaver Shyti, punonjëses së Kadastrës Fjorelo Bida dhe noteres Anila Haxhiu. Ndërkohë, gjykata ka caktuar masat «detyrim paraqitjeje» dhe «ndalim i daljes jashtë shtetit» për punonjësen tjetër të Kadastrës, Arbina Jaupaj. Zhurma Press kujton se çdo person prezumohet i pafajshëm deri sa të vërtetohet fajësia me vendim gjyqësor të formës së prerë.