Inspektorati ndal punimet në 6 kantiere në Prishtinë e Fushë Kosovë

Inspektorati Qendror i Punës ka ndërprerë punimet në gjashtë kantiere ndërtimi në komunat e Prishtinës dhe Fushë Kosovës, pas konstatimit të mungesës së masave të nevojshme për sigurinë dhe shëndetin në punë. Gjatë inspektimeve të zhvilluara në terren, zyrtarët kanë evidentuar shkelje të dispozitave ligjore, të cilat sipas Inspektoratit paraqisnin rrezik serioz për jetën dhe shëndetin e punëtorëve.

Sipas Telegrafit, Inspektorati Qendror i Punës ka marrë vendim për ndalimin e menjëhershëm të punimeve në gjashtë kantiere ndërtimi – tre në Fushë Kosovë dhe tre në Prishtinë – deri në eliminimin e plotë të të gjitha parregullsive të evidentuara.

Masat e ndërmarra kanë për qëllim parandalimin e aksidenteve në vendin e punës dhe garantimin e kushteve të sigurta për të gjithë punëtorët. Subjektet e inspektuara janë obliguar të ndërmarrin të gjitha veprimet e nevojshme për përmbushjen e kërkesave ligjore, ndërsa rifillimi i punimeve do të lejohet vetëm pasi inspektorët të konstatojnë se janë eliminuar rreziqet dhe janë përmbushur standardet e sigurisë dhe shëndetit në punë.

Inspektorati Qendror i Punës thekson se ka bashkëpunuar me FSK-në dhe Policinë për të siguruar kushtet e sigurisë në punë.

Burim: Klan Kosova

— Redaksia ZHURMA