Imami me origjinë shqiptare largohet nga detyrat në Zvicër pas hulumtimit

Imami me origjinë shqiptare, Bashkim Aliu, është detyruar të largohet nga të gjitha funksionet e tij publike në Zvicër pas një hulumtimi të publikuar nga gazeta SonntagsZeitung. Hulumtimi solli në vëmendje qëndrimet e tij të hershme dhe kontaktet me qarqe radikale islamike, përfshirë pjesëmarrjen në një ngjarje ku ishte i pranishëm edhe lideri i Hamasit, Ismail Hanije, i cili më vonë u vra në Teheran.

Deri në mesin e javës, Aliu ka mbajtur pozita të rëndësishme drejtuese, duke udhëhequr Komisionin e Imamëve pranë Federatës së Organizatave Islamike në Zvicër dhe duke shërbyer si autoriteti më i lartë teologjik i Bashkimit të Organizatave Islamike në Zürich. Pas publikimit të gjetjeve, Federata e ka shkarkuar menjëherë, ndërsa vetë ai ka dhënë dorëheqjen nga të gjitha postet e tjera. Hulumtimi zbardhi gjithashtu një postim të vitit 2017 ku parada e krenarisë në Prishtinë cilësohej si paradë e turpit, ndërsa organizatat u distancuan nga qëndrime të tilla që bien ndesh me ligjin zviceran.

Skandali përfshin edhe një udhëtim të imamit në Doha të Katarit gjatë muajit janar të vitit 2024, ku mori pjesë në asamblenë e një organizate të lidhur me Vëllezërit Myslimanë, ngjarje në të cilën foli edhe shefi i atëhershëm i Hamasit. Drejtuesit e federatës deklaruan se nuk kishin dijeni për këtë pjesëmarrje, kurse bashkimi islamik i Cyrihut njoftoi se po kryen verifikime të mëtejshme. Ngjarja ka marrë përmasa politike edhe për shkak të fondeve publike, pasi kantoni i Cyrihut i ka kaluar bashkimit islamik rreth 2.5 milionë franga për projektin e kujdesit shpirtëror nga viti 2017 deri në vitin 2025, krahas mbështetjes vjetore prej 50 mijë frangash nga qyteti.