Sara Mila del nga SPAK: Kam dhënë dëshminë si person në dijeni

Deputetja e Partisë Socialiste për qarkun e Elbasanit, Sara Mila, ka dalë nga ambientet e Prokurorisë së Posaçme pas afro një ore, ku deklaroi se ka dhënë dëshminë e saj si person që ka dijeni për çështjen. Ajo u shpreh para gazetarëve se do të jetë e pranishme në organet e drejtësisë sa herë të thirret, ndërsa më parë ishte paraqitur në SPAK për përballjen me hetimet.

Mila po hetohet nga prokurori Bledar Maksuti në lidhje me dyshimet për korrupsion në zgjedhje. Hetimet e organit të akuzës përqendrohen te dyshimet për përdorimin e ndihmës ekonomike dhe përfitimeve të tjera për të ndikuar te votuesit gjatë procesit zgjedhor në Elbasan, ku deputetja doli më e pëlqyera në radhët e socialistëve.

Pas daljes nga struktura e posaçme, deputetja e PS-së refuzoi t'i përgjigjej pyetjes së gazetarëve nëse ka pasur korrupsion në zgjedhjet e Elbasanit, duke u larguar me arsyetimin se e prisnin qytetarët për festën e Çlirimit. Ajo theksoi se mbrohet nga sekreti hetimor dhe akuzoi aparatet e politikës së vjetër për hedhje balte ndaj saj.

«Sa i përket pranisë sime këtu, në organet e drejtësisë nuk vihet vetëm për ato që i keni me shumë qejf të deklaroni, por vihet për një përgjegjësi publike, një përgjegjësi politike. Shumë baltë është hedhur mbi mua nga aparatet e politikës së vjetër. Ky është një moment shumë i mirë për të treguar dinjitetin tim. Sa i përket sekretit hetimor, jam person në dijeni, kam dhënë dëshminë time dhe kam përshtypjen që ky kalvar i gjatë i hedhjes së baltës së politikës së vjetër do të përfundojë. Sa herë SPAK-u dhe organet e drejtësisë të kenë nevojë, edhe në respekt të besimit të të gjithë qytetarëve të Elbasanit, do të jem këtu sa herë të jetë e nevojshme», deklaroi Sara Mila.