Hoti e Murati përplasen për përgjegjësinë e buxhetit të Lojërave Mesdhetare

PRISHTINË — Deputeti i Lidhjes Demokratike të Kosovës, Avdullah Hoti, dhe ministri i Financave, Hekuran Murati, janë përplasur gjatë diskutimeve në Komisionin për Buxhet lidhur me financimin dhe ndërtimin e objekteve për Lojërat Mesdhetare Prishtina 2030.

Kjo përplasje në Komisionin për Buxhet vjen pas zhvillimeve të mëparshme rreth këtij organizimi sportive. Më parë, siç raportoi Zhurma më 9 nëntor 2026, Komiteti Ndërkombëtar i Lojërave Mesdhetare i kishte kërkuar Kosovës shlyerjen e detyrimeve financiare dhe kishte paralajmëruar për muajt e humbur para takimit të planifikuar në Athinë.

Gjatë mbledhjes së komisionit, Avdullah Hoti ka kritikuar ekzekutivin për mungesë të marrjes së përgjegjësisë në organizimin e kësaj ngjarjeje. Deputeti i LDK-së ka kërkuar që Qeveria të marrë përsipër financimin e plotë të projekteve të nevojshme në rast se Komuna e Prishtinës nuk arrin t'i realizojë ato. Hoti po ashtu ka thënë se punimet për objektet sportive do të duhej të përfundonin plotësisht në vitin 2027 ose 2028, duke marrë parasysh se Lojërat do të zhvillohen në vitin 2030 dhe do të shpërndahen edhe në komuna të tjera.

Nga ana tjetër, ministri i Financave, Hekuran Murati, ka deklaruar se buxheti për Lojërat Mesdhetare është akomoduar në kuadër të Ministrisë së Sportit. Murati ka spjeguar se ende nuk ka një saktësim të lokacioneve për të gjitha sportet ku parashihet të ndërtohen objekte sportive, por ka shtuar se sapo të ketë qartësim, Ministria e Sportit mund të vazhdojë me zbatimin e projektit.

Debati midis dy zyrtarëve pason sfidat me të cilat vazhdojnë të përballen përgatitjet për këtë ngjarje sportive, e cila kërkon koordinim mes institucioneve dhe realizimin me kohë të projekteve infrastrukturore.

«Lojërat Olimpike (Mesdhetare), me Komunën e Prishtinës “kërrsh” jeni bërë duke u shtyrë njëri me tjetrin. Duhet të marrësh pronësi, ti qeveri je. T’i të marrësh pronësi për të gjitha ato, për krejt buxhetin që duhet për Lojërat Olimpike edhe t’i inkuadrosh ti në buxhet nëse Komuna e Prishtinës nuk e bën, edhe komunat tjera sepse do të shpërndahen gjithandej, duhet të marrësh pronësi. Në 2030-tën do të ndodhin, më 2027 ose 2028 do të duhej të përfundonin plotësisht», theksoi Hoti.

«Tek çështja e Lojërave Mesdhetare, edhe këtu kemi situatën e ngjajshme meqenëse ende nuk ka saktësim të lokacioneve për të gjitha sportet ku parashihet të ketë ndërtim. Ideja ka qenë që të ketë një grumbullim dhe në momentin që ka qartësim, Ministria e Sportit mund të vazhdojë me zbatimin e projektit por buxhetimi, pra jemi munduar që ta akomodojmë të gjithë shumën në buxhet të Ministrisë së Sportit», deklaroi Murati.