ICMG paralajmëron Ministrinë e Sportit se Lojërat Mesdhetare 2030 po rrezikohen

Komiteti Ndërkombëtar i Lojërave Mesdhetare i ka dërguar një letër ministrit të Sportit, Blerim Gashani, më 5 nëntor 2026, ku paralajmëron se Lojërat Mesdhetare Prishtina 2030 rrezikojnë të mbeten vetëm në letër. Sipas dokumentit, takimi i parashikuar për 19 nëntor në Athinë me Komitetin Organizativ nuk mund të zhvillohet pa u shlyer më parë obligimet financiare të papaguara nga Kosova.

Siç raportoi Zhurma më 2 nëntor 2026, kryetari i Prishtinës, Përparim Rama, pati paralajmëruar gjithashtu se Qeveria po rrezikonte seriozisht organizimin e këtij aktiviteti pas miratimit të buxhetit.

Në letrën e drejtuar ministrit Gashani, Komiteti Ndërkombëtar bën me dije se shlyerja e detyrimeve financiare përbën kushtin minimal për respektimin e Kartës së Lojërave Mesdhetare dhe Kontratës së Qytetit Mikpritës. Po ashtu, autoritetet ndërkombëtare theksojnë se Kosova nuk i ka kthyer përgjigje me shkrim shqetësimeve të ngritura që prej 21 shtatorit 2026. Këto përgjigje duhet të dorëzohen me shkrim jo më vonë se tri ditë para mbërritjes së delegacionit në kryeqytetin grek, ku parashikohet takimi me trupin organizativ që kryesohet nga Kryeministri Kurti.

Komiteti Ndërkombëtar ka nëvizuar se gjatë kësaj periudhe janë humbur plot 38 muaj kohë përgatitore. Sipas letrës zyrtare, projekti i lojërave nuk mund të përballojë më vonesa të mëtejshme dhe bisedimet nuk mund të kthehen më në pikat fillestare apo supozimet e mëparshme. Gjithashtu, infrastrukturat e planifikuara dhe Stadiumi Nacional mbeten ende pa u ndërtuar.

Delegacioni i Komitetit Organizativ të Kosovës pritet të udhëtojë drejt Athinës më 19 nëntor për takimin e përbashkët, me kusht që të gjitha detyrimet e kërkuara financiare dhe përgjigjet me shkrim të dorëzohen tre ditë para kësaj date.

«Duhet ta kuptoni plotësisht se tashmë janë humbur 38 muaj kohë përgatitore. Projekti nuk mund të përballojë më vonesa të mëtejshme dhe diskutimet nuk mund të kthehen në pikat fillestare apo supozimet e planifikimit që tashmë janë zëvendësuar nga vendimet e mëvonshme», thuhet në letrën e Komitetit Ndërkombëtar të Lojërave Mesdhetare.