Aksident fatal në Itali: Vdes 20-vjeçari shqiptar Rogert Ajdini gjatë punës

Shqiptari 20-vjeçar Rogert Ajdini, banues në Trevi, ka humbur jetën në një aksident tragjik në vendin e punës në Valtopina të Italisë. Ngjarja e rëndë ka ndodhur gjatë mëngjesit në rrugën Santa Cristina, ku i riu po punonte me punonjës të tjerë për asfaltimin e rrugës dhe mjeti rrafshues i asfaltit që ai drejtonte është përmbysur duke e zënë poshtë.

Punimet po zhvilloheshin në aksin rrugor Santa Cristina, i cili lidh zonën e impianteve sportive me kodrat përreth. Bashkia e Valtopinës kishte marrë vendim të ndërhynte për përmirësimin e infrastrukturës rrugore, pasi pjesa më e madhe e kësaj rruge ishte e paasfaltuar, ndërsa realizimi i projekteve i ishte besuar një kompanie të specializuar.

Kolegët e të riut kanë njoftuar menjëherë shërbimet e emergjencës pas përmbysjes së mjetit të rëndë. Në vendngjarje kanë mbërritur personeli mjekësor i urgjencës 118, zjarrfikësit, si dhe helikopteri i shpëtimit Nibbio i nisur nga Foligno, por plagët e marra kanë qenë fatale dhe mjekët nuk kanë mundur ta shpëtojnë 20-vjeçarin. Karabinierët kanë mbërritur po ashtu në zonë dhe kanë nisur hetimet për të përcaktuar shkaqet dhe rrethanat e plota të përmbysjes së mjetit.

Hetimet nga autoritetet përkatëse vijojnë për të sqaruar plotësisht dinamikën e këtij aksidenti fatal në vendin e punës.

Lajmi për ndarjen nga jeta të të riut ka prekur komunitetin lokal. Kryetari i Bashkisë së Valtopinës, Gabriele Coccia, i cili ndodhej jashtë qytetit për arsye pune, është kthyer menjëherë pas marrjes së lajmit dhe ka shprehur ngushëllimet për familjen, duke e cilësuar ngjarjen si një tragjedi të rëndë. Po ashtu, përmes një reagimi publik u deklarua: «Administrata bashkiake shpreh dhimbjen e saj të thellë për humbjen tragjike».