Peshkatari shqiptar shpallet fajtor në Britani për kontrabandimin e 17 emigrantëve

Peshkatari shqiptar Eno Gajda u shpall fajtor për lehtësimin e emigracionit të paligjshëm pasi tentoi të fuste 17 emigrantë në Mbretërinë e Bashkuar me jaht. I pandehuri u deklarua fajtor në Gjykatën e Kurorës në Bournemouth pas një hetimi nga Agjencia Kombëtare e Krimit dhe ndalimit nga Komanda e Sigurisë Kufitare në brigjet e Dorset.

Aksioni i autoriteteve britanike nisi pas zbulimit të mjetit lundrues që vinte nga Franca. Mjeti lundrues ishte nisur nga Dielette dhe u gjurmua gjatë lundrimit drejt bregdetit pranë Portlandit. Oficerët e sigurisë kufitare hipën në jahtin 40 këmbë të gjatë dhe arrestuan drejtuesin e tij, duke e shoqëruar anijen drejt portit më të afërt për veprime të mëtejshme.

Agjencia Kombëtare e Krimit njoftoi se ngjarja ka ndodhur më 27 gusht të këtij viti, kur mjeti u shoqërua në Portland Marina. Pas zbarkimit në port, autoritetet identifikuan në bord 16 burra shqiptarë dhe një i mitur i gjinisë mashkullore. Personat e gjetur në jaht u morën në trajtim nga autoritetet e imigracionit, ndërsa i pandehuri u shoqërua për t'u marrë në pyetje nga hetuesit. Gjykata e Kurorës në Bournemouth mori pranimin e fajësisë nga i pandehuri gjatë seancës së mbajtur të hënën, më 26 tetor.

Vendimi për masën e dënimit ndaj të pandehurit do të jepet më 18 nëntor në të njëjtën gjykatë. Ndërkohë, autoritetet britanike po vazhdojnë punën operative pasi agjencia ka aktualisht më shumë se 100 hetime aktive ndaj individëve dhe rrjeteve të përfshira në kontrabandën e emigrantëve. Agjencia njoftoi se investimi i burimeve ka sjellë rritje të sekuestrimeve, arrestimeve dhe ndërprerjeve të aktivitetit kriminal.

Komandanti i degës së NCA-së, Andy Tickner, deklaroi se ky rast përbënte një përpjekje të paturpshme për të kontrabanduar një grup emigrantësh të cenueshëm drejt Mbretërisë së Bashkuar. Ai theksoi se edhe pse i pandehuri kishte përvojë në det, lundrimi nëpër një nga korsitë më të ngarkuara të transportit detar në botë vuri në rrezik shumë jetë. Drejtori për Çështjet Detare dhe Mjetet e Vogla Lundruese në Komandën e Sigurisë Kufitare, Charlie Eastaugh, tha se dënimi është dëshmi e punës së oficerëve dhe se kontrabandistët kujdesen për fitimin, jo për jetët që vënë në rrezik.