Arbenita Ismajli thotë se humbi besimin te institucionet për sigurinë

Modelja shqiptare, Arbenita Ismajli, ka ngritur shqetësime në rrjete sociale lidhur me pozitën e grave në shoqëri, patriarkatin dhe mungesën e besimit te institucionet që duhet të garantojnë sigurinë. Në mesazhet e saj drejtuar grave, ajo ka kërkuar që ato të ruajnë pavarësinë dhe të mos i nënshtrohen normave tradicionale. «Oj femra, mjaft u dhatë pushtet burrave mbi jetët tuaja! Mos u martoni, mos bëni fëmijë vetëm sepse kështu e kërkon shoqëria», ka shkruar ajo.

Duke folur nga këndvështrimi i saj si nënë, Ismajli ka shprehur zhgënjimin ndaj gjykatave, prokurorisë dhe Qendrës për Punë Sociale, duke pretenduar se frika dhe trauma e saj nuk janë trajtuar me seriozitetin e duhur. «Për ta ishim thjesht një dosje, jo dy jetë njerëzish që meritonin mbrojtje», thuhet në reagim, ndërsa ajo ka shtuar se detyrimi i saj kryesor mbetet mbrojtja e fëmijës dhe e vetvetes. Reagimi i modeles vjen pas vrasjes së Arlinda Zekajt, e cila më parë i ishte drejtuar me një letër kryeprokurores në Pejë. Arbenita ka qenë e martuar me reperin Fero, i cili është përballur me akuza për dhunë në familje.