Hazizaj: Historia e trafikimit u rrëzua nga fotot e ish-të dashurës

Igli Hazizaj, një 28-vjeçar shqiptar, u urdhërua të kthehet në Shqipëri nga një gjyqtar në Qendrën e Drejtësisë Civile të Mançesterit, pasi pretendimet e tij se ishte trafikuar në Mbretërinë e Bashkuar u rrëzuan nga fotot e publikuara nga ish-e dashura e tij. Sipas burimeve, në shkurt të vitit 2025 Hazizaj u burgos për dy vjet pasi u dënua për komplot për të prodhuar kanabis, ndërsa Gjykata e Kurorës në Carlisle dëgjoi se ai ishte organizatori kryesor i një operacioni me tre shtëpi të shndërruara në ferma kanabisi me potencial fitimi mbi dy milionë paund në vit.

Më parë, në dhjetor të vitit të kaluar, ishte urdhëruar deportimi i tij, por Hazizaj kishte apeluar vendimin duke pretenduar para gjykatës në Mançester se ishte detyruar të punonte në ferma kanabisi për shkak të një borxhi që babai i tij i kishte një bande. Sipas të dhënave të paraqitura nga Ministria e Brendshme, historia e tij përfshinte mospërputhje të shumta, duke përfshirë të dhënat e fluturimit që dëshmonin se ai kishte udhëtuar për në dhe nga Shqipëria në kohën kur pretendonte se mbahej rob. Historia e tij u shemb përfundimisht kur ish-partnerja e tij publikoi fotografi nga rrjetet sociale që tregonin atë duke i propozuar martesë në Mançester, në një festë beqarie në Uells dhe duke festuar diplomimin e saj në Swansea.

Duke rrëzuar apelin, gjykatësi Chris Cole konstatoi se Hazizaj kishte fabrikuar të gjithë rrëfimin dhe nuk kishte arritur të provonte se ngjarjet ishin të vërteta, duke shtuar se mënyra e tij e jetesës tregonte se ai nuk ishte viktimë e trafikimit. Sipas gjykatës, Hazizaj do të ekstradohet në Shqipëri edhe pasi u dënua me nëntë muaj burgim për shkak se u kap duke u përpjekur të hipte në një fluturim nga Tirana për në Barcelonë me një pasaportë greke të falsifikuar. Për më tepër, Hazizaj nuk mori pjesë në seancën dëgjimore, ndërsa përpjekjet për ta gjetur përmes ish-partneres dhe firmës ligjore rezultuan të pasuksesshme.