"Harmonia Albanica" luan "Katër Stinët" e Vivaldit në Shkodër
Koncerti shërbeu edhe si përgatitje për shfaqjen e nesërme në Tuz të Malit të Zi, tha mjeshtri i violinës Lorenc Radovani.
SHKODËR — Ansambli i Harqeve “Harmonia Albanica” interpretoi kryeveprën “Katër Stinët” të Antonio Vivaldit në oborrin e Qendrës Rinore “Arka” në Shkodër, në një koncert që tërhoqi pjesëmarrje të lartë të publikut. Mbrëmja ndërthuri muzikën klasike me atmosferën karakteristike të oborrit shkodran, duke i dhënë publikut një përjetim të veçantë kulturor.
“Këtë vit është planifikuar të interpretohet një nga kryeveprat e letërsisë klasike botërore, e ndërthurur me një koment mbi sonetet që e frymëzuan autorin,” u shpreh Dritan Mlika, udhëheqës artistik i ansamblit.
“Publiku i Shkodrës është shumë i dashur dhe një treg shumë i bukur për artistët,” tha Lorenc Radovani, mjeshtër i violinës, duke shtuar se koncerti shërbeu edhe si përgatitje për shfaqjen e së nesërmes në qytetin e Tuzit, në Mal të Zi.
Burim: Gazeta Tema
— Redaksia ZHURMA
