Hajrizi: Atmosfera në Kombëtaren e Kosovës është shumë e mirë

Kombëtarja e Kosovës ka zhvilluar seancën e dytë stërvitore në kuadër të përgatitjeve për ndeshjet e ardhshme në Ligën e Kombeve, ku në stërvitje ishin të pranishëm të gjithë futbollistët me përjashtim të Lumbardh Dellovës, i cili është liruar nga grumbullimi pasi ekzaminimet mjekësore konfirmuan se qendërmbrojtësi nuk do të jetë në gjendje të ndihmojë skuadrën. Kreshnik Hajrizi, i cili është rikthuar pas lëndimit, ka deklaruar për faqen zyrtare të Federatës së Futbollit të Kosovës se përgatitjet po zhvillohen në mënyrën më të mirë dhe se ekipi ndihet shumë mirë. «Rikthimi im ka qenë një kënaqësi e madhe. Tash, pas lëndimit, gjithçka ka shkuar mirë. Edhe stërvitjet kanë shkuar shumë mirë, po përgatitemi për ndeshjen dhe, si gjithmonë, ekipi ndihet shumë mirë. Atmosfera është e mirë», ka thënë Hajrizi, duke shtuar se është më mirë të luhet në shtëpi para tifozëve dhe duke shpresuar për një lojë pozitive me tri pikë. Ndërkohë, Betim Fazliji u shpreh i lumtur dhe krenar për rikthimin në kombëtaren dardane, duke vlerësuar se ekipi është në formë shumë të mirë, të motivuar dhe të fokusuar për ndeshjen si vendas në stadiumin «Fadil Vokrri». Kosova do të përballet me Izraelin më 14 nëntor.