Connor Withers shpallet MVP i javës në Superligën e Kosovës në basketboll

Basketbollisti i skuadrës therandase të Golden Eagle Yllit, Connor Withers, është shpallur më i vlefshmi i javës së shtatë në Superligën e Kosovës në basketboll, sipas njoftimit të Federatës së Basketbollit të Kosovës. Withers e fitoi këtë çmim pas një paraqitjeje të shkëlqyer individuale në fitoren e skuadrës së tij ndaj Rahovecit 029, ku realizoi 16 pikë, shtatë kërcime dhe shtatë asistime, duke regjistruar një indeks prej 33.

Krahas lojtarit të Yllit, në pesëshen më të mirë të kësaj xhiroje janë përfshirë edhe katër basketbollistë të tjerë nga klubet e Superligës. Divine Myles i Bashkimit u dallua me 23 pikë, një kërcim dhe nëntë asistime në ndeshjen kundër Vëllaznimit, duke kapur indeksin 26. Te Vëllaznimi u dallua Kentrell Pullian me 27 pikë, gjashtë kërcime dhe gjashtë asistime, me indeksin 35. Drilon Hajrizi i Trepçës kontribuoi në fitoren ndaj Sigal Prishtinës me 13 pikë, gjashtë kërcime dhe katër asistime, duke arritur indeksin 18. Ndërkohë, Muhamedali Janjeva i Borës shënoi 23 pikë, dy kërcime dhe dy asistime në triumfin kundër Pejës, me indeksin 19.