Gucati: Jakup Krasniqi refuzoi kontrollin e syve në Hagë

Kreu i OVL-UÇK-së, Hysni Gucati, ka vizituar Jakup Krasniqin në qendrën e paraburgimit në Hagë, duke konfirmuar se ai ka refuzuar të vizitohet nga mjekët për problemet e tij me shikimin. Gucati ka bërë të kihet parasysh se Krasniqi kishte për t'i kryer kontrollat e syve, por i ka refuzuar sërish, ndonëse vetë ai dhe të burgosurit e tjerë brenda janë përpjekur ta bindin.

Siç raportoi Zhurma më 21 tetor 2026, vajza e ish-kryetarit të Kuvendit, Gresa Krasniqi, kishte shprehur shqetësimin e saj pas një bisede telefonike me të atin, pasi sipas tij i ishte mohuar çdo e drejtë njerëzore dhe kishte refuzuar kujdesin mjekësor në paraburgim.

Gucati në RTV 21 ka treguar se personalisht i ka kërkuar Krasniqit që të mos e refuzojë asistencën mjekësore, duke e vlerësuar atë si diçka të domosdoshme. Përveç kësaj, kreu i OVL-UÇK-së ka paralajmëruar se gjatë këtij muaji do t'i vizitojë në Hagë edhe udhëheqësit e tjerë, duke shtuar se do t'i takojë Hashim Thaçin dhe Kadri Veselin me 11 dhe 12 nëntor, ndërsa Rexhep Selimin në fund të muajit.

Sa i takon çështjes së Ligjit për Specialen, Gucati ka deklaruar se ai është ligj i mirë dhe ka adresuar një thirrje publike drejtuar kryeministrit Albin Kurti që të mos ndërmarrë ndonjë marrëveshje me Bashkimin Evropian që do të dëmtonte interesin e vendit gjatë diskutimeve për këtë ligj.

«Ka pasë t’i bëjë kontrollat e syve, ka refzu prapë. Unë u mundova ta bindë. Edhe shokët brenda janë munduar», ka deklaruar Gucati në lidhje me përpjekjet e bëra për ta bindur Krasniqin që të pranojë kontrollin mjekësor.