Altin Krasniqi: Shtëpia s’është e njëjtë pa Jakup Krasniqin

Më 4 nëntor janë bërë gjashtë vjet nga arrestimi i ish-kryetarit të Kuvendit të Kosovës, Jakup Krasniqi, dhe dërgimit të tij në Hagë. Me këtë rast, djali i tij, deputeti Altin Krasniqi, ka publikuar një dedikim emocional ku shpreh dhimbjen dhe mallin për të atin, duke theksuar se mungesa e tij në familje është ndër dhimbjet më të mëdha.

Siç raportoi Zhurma më 21 tetor 2026, më parë edhe vajza e ish-kryetarit të Kuvendit, Gresa Krasniqi, kishte shprehur shqetësimin e saj pas një bisede telefonike me të atin, i cili kishte refuzuar kujdesin mjekësor në Hagë me arsyetimin se i është mohuar çdo e drejtë njerëzore në qendrën e paraburgimit.

Sipas deputetit Altin Krasniqi, babai i tij ka merituar që vitet e pleqërisë t'i kalojë pranë bashkëshortes, fëmijëve dhe familjes së vet, të shijojë ditët pa brenga e të plaket i rrethuar nga dashuria e tyre, e jo pas mureve që e ndajnë nga çdo gjë që ka ndërtuar gjatë jetës. Ai ka deklaruar se pas 16 shtatorit çdo gjë është bërë më e rëndë, duke shtuar se asnjë ditë larg tij nuk do t'i bëjë të mësohen me mungesën e tij sepse shtëpia nuk është e njëjtë pa të.

Altin Krasniqi ka nënkuptuar se familja vazhdon ta presë e të shpresojë se do të vijë dita kur kjo pritje do të marrë fund dhe ish-kryetari i Kuvendit do të kthehet në shtëpi pranë bashkëshortes dhe fëmijëve të tij.

«Asnjëherë nuk e kam pasur më të vështirë se këtë herë të shkruaj për këtë ditë. Herëve tjera, sado e rëndë ishte pritja, e mbanim një shpresë në zemër, besonim se në fund do të kishte drejtësia, se një ditë kjo padrejtësi do të merrte fund dhe ti do të ktheheshe në shtëpi», ka shkruar Altin Krasniqi në mesazhin e tij publik.