Pse ADN-ja e 350 mijë eurove tregon në gjyqtarin Ristov?

SHKUP — Ekspertët e Ministrisë së Punëve të Brendshme kanë konfirmuar se në mbështjellëset prej alumini ku ishin fshehur 350 mijë euro janë gjetur gjurmë biologjike të Gjoko Ristovit, gjyqtarit të Apelit të Maqedonisë së Veriut. Paratë, të përbëra nga 600 kartëmonedha me vlerë 500 dhe 200 euro, u zbuluan të fshehura brenda murit të kuzhinës së shtëpisë së prindërve të tij.

Nga 13 mostra të marra për analizë, vetëm dy ishin të përshtatshme. ADN-ja e gjetur u krahasua me atë të Ristovit dhe prindërve të tij, duke zbuluar se gjurmët i përkisnin atij dhe një personi tjetër të panjohur, pa lidhje gjaku. Prokurorja Iskra Haxhi Vasileva deklaroi se rezultatet konfirmojnë versionin e Prokurorisë për fshehje pasurie dhe pastrim parash.

Mbrojtja e Ristovit, megjithatë, kundërshton vlefshmërinë e provave. Avokati Zvonko Davidoviq pretendoi se mbështjellëset prej alumini nuk u ruajtën sipas procedurës dhe se ekspertiza u krye vetëm mbi copat e aluminit, jo mbi kartëmonedhat. Ai vuri në dyshim edhe vonesën 80 ditore në urdhërimin e analizës, pasi paratë ishin dorëzuar në Agjencinë për Menaxhimin e Pasurisë së Konfiskuar.

Prokurorja Haxhi Vasileva i hodhi poshtë këto pretendime, duke theksuar se gjurmët biologjike ekzistojnë pavarësisht mundësisë së kontaminimit. Ajo sqaroi se provat janë të mjaftueshme për të lidhur Ristovin me paratë, duke i cilësuar kundërshtimet e mbrojtjes si përpjekje për zvarritje të procedurës.

Seanca e radhës është caktuar për 14 korrik, ku pritet të dëshmojë një ekspert tjetër i MPB-së. Prokuroria do të vazhdojë paraqitjen e provave, ndërsa mbrojtja ka ngritur dyshime të mëtejshme për transparencën e hetimit. Burim: Tetova Sot
— Redaksia ZHURMA