Gërvalla: LDK-ja ka më shumë se dy rryma, nuk dihet me cilën po flet

PRISHTINË — Zëvendëskryeministrja në detyrë Donika Gërvalla ka vlerësuar se Lidhja Demokratike e Kosovës ka "më shumë se dy rryma" brenda saj, duke e bërë të paqartë se me cilën pikërisht po negociohet. "Problem është sot të flitet me LDK-në sepse nuk dihet me cilën rrymë je duke folur", ka thënë ajo.

Gërvalla, e cila ka qenë anëtare e LDK-së, komentoi zhvillimet e së martës ku tri degë të partisë kërkuan dorëheqjen e kryetarit Lumir Abdixhiku. Ajo theksoi se pas këtyre ngjarjeve, LDK-ja duhet të vëzhgohet "më me kujdes si partner potencial për koalicion".

"Nuk është detyrë e imja ta krijojë unitetin brenda LDK-së, unë kam dështuar ta krijojë unitetin brenda LDK-së. Dy vjet pasi më kanë trajtuar në mënyrën më të shëmtuar, jam dorëhequr", ka shtuar Gërvalla, duke iu referuar periudhës së saj në parti.

Dega e LDK-së në Pejë, ajo në Lipjan si dhe dega e dytë në Prishtinë kanë kërkuar publikisht dorëheqjen e Abdixhikut. Dega në Pejë njoftoi se kryesia e saj me shumicë votash kërkoi nga lidershipi të japë dorëheqje si "akt moral".

Edhe kryesia e degës në Lipjan mbajti mbledhje me kryetarët e nëndegëve për të diskutuar rezultatin e zgjedhjeve të 7 qershorit, duke iu bashkuar kërkesës për largimin e Abdixhikut. Dega e dytë e Prishtinës vlerësoi se partia po kalon "një nga periudhat më të vështira në histori".

LDK-ja në zgjedhjet e 7 qershorit u radhit sërish e treta me 16.69% të votave, rezultat që ka shtuar presionin mbi Abdixhikun. Humbja e vazhdueshme zgjedhore ka hapur debat të brendshëm për drejtimin e partisë.

Gërvalla ka lënë të kuptohet se çdo koalicion i mundshëm varet nga se cila rrymë do të fitojë brenda LDK-së në ditët në vijim. Ajo nuk ka përjashtuar bashkëpunimin, por ka kërkuar vëzhgim të kujdesshëm përpara çdo vendimi.

Burim: Koha.net
— Redaksia ZHURMA