Gara: Deri më tani janë trajtuar rreth 20 lokacione për gërmime
Udhëheqësi i Njësisë së Komisionit Qeveritar për Persona të Zhdukur njofton për aktivitetet në terren dhe sfidat e kërkimeve.
Redaksia ZHURMA · · 2 min lexim
Gjatë këtij viti janë trajtuar afërsisht 20 lokacione për gërmime vlerësuese në kuadër të përpjekjeve institucionale për zbardhjen e fatit të personave të zhdukur nga lufta. Kushtrim Gara ka bërë të ditur se në tre deri në katër lokacione të tjera pritet të zhvillohen aktivitete deri në përfundim të vitit, ndërkohë që aktualisht po punohet në një zonë mes Kaçanikut dhe Shtërpcës. Sipas tij, në agjendë janë futur edhe hapësira të tjera në pjesë të ndryshme të vendit, duke përfshirë varrezat në veri të Mitrovicës dhe ato në lagjen Arbëria të Prishtinës.
Gjatë periudhës së konfliktit të armatosur, lokacionet e varrezave në qytetet e mëdha dhe në vendbanime të ndryshme dyshohet se janë shfrytëzuar nga forcat serbe me qëllim të fshehjes së trupave dhe gjurmëve të krimeve. Gara ka theksuar se mungesa e të dhënave dhe informacioneve nga arkivat zyrtare të Serbisë i bën kërkimet tepër sfiduese, ndërsa procesi synon zbardhjen e fatit të mbi 1,500 qytetarëve që vazhdojnë të figurojnë në listat e të zhdukurve.
Lidhur me angazhimet e fundit në varrezat masive në Kalludër dhe Jabukë të Zubin Potokut, janë siguruar raportet e ADN-së për gjashtë raste të konfirmuara identifikimi, ndërsa mbeten në pritje rezultatet për mostrat e tjera të dërguara për testim në laboratorin e Komisionit Ndërkombëtar për Persona të Zhdukur. Pas pranimit të raporteve për tri identifikimet e bëra publike më 3 nëntor, janë mbajtur takime me familjarët për të shqyrtuar procedurat e mëtejshme, kurse gjatë rigërmimeve në varrezat e besimtarëve myslimanë në veri të Mitrovicës janë zhvarrosur mbetjet mortore të një personi.
