Çfarë progresi njeh FMN-ja te BQK-ja në stabilitetin financiar të Kosovës?

PRISHTINË — Fondi Monetar Ndërkombëtar (FMN) ka lëshuar një raport që vlerëson progresin e arritur nga Banka Qendrore e Republikës së Kosovës (BQK) në forcimin e kornizës së stabilitetit financiar. Vlerësimi u bë publik nëpërmjet komunikatës zyrtare të BQK-së.

Sipas raportit, sistemi financiar i Kosovës mbetet i qëndrueshëm: bankat janë mirëkapitalizuara, niveli i kredive joperformuese është i ulët dhe likuiditeti qëndron mbi kërkesat rregullative.

FMN njeh avancime të rëndësishme në mbikëqyrjen e sektorit financiar, duke përfshirë qasjen e bazuar në rrezik, zbatimin e procesit të rishikimit dhe vlerësimit mbikëqyrës (SREP/SRP), si dhe testimin e qëndrueshmërisë dhe zhvillimin e politikave makroprudenciale.

Që nga vlerësimi i parë i stabilitetit financiar, BQK-ja ka ndërmarrë reforma konkrete: zbatimin e standardeve ndërkombëtare Basel III përmes instrumenteve si Raporti i Levës, LCR dhe NSFR, aktivizimin e mekanizmave makroprudencialë, identifikimin e bankave me rëndësi sistemike dhe vendosjen e shtesës kundërciklike të kapitalit.

Raporti thekson gjithashtu progresin në forcimin e kapaciteteve institucionale, analizën e stabilitetit financiar dhe përgatitjen për menaxhimin e krizave, duke ofruar një udhërrëfyes për reformat e ardhshme.

BQK-ja ka shprehur mirënjohje ndaj FMN-së dhe partnerëve ndërkombëtarë për mbështetjen në zhvillimin e kapaciteteve dhe asistencën teknike, ndërsa ka ritheksuar përkushtimin për zbatimin e reformave në përputhje me standardet ndërkombëtare dhe praktikat e Bashkimit Evropian, me synim ruajtjen e stabilitetit financiar dhe zhvillimin e qëndrueshëm të sektorit financiar në Kosovë.

Burim: Zeri
— Redaksia ZHURMA