Prishtina lidhet me 40 aeroporte gjermane — 127 fluturime direkte brenda një jave
Ambasadori Faruk Ajeti deklaroi se ky qarkullim mundëson lëvizjen e shpejtë të kapitalit dhe ndërmarrësve mes Prishtinës e Berlinit.
PRISHTINË — Mbi 120 fluturime direkte nga 40 aeroporte të Gjermanisë janë realizuar brenda një jave drejt Aeroportit Ndërkombëtar "Adem Jashari" në Prishtinë. Këtë shifër prej 127 fluturimesh e bëri të ditur Faruk Ajeti, ambasador i Kosovës në Gjermani, gjatë një takimi të bizneseve në kryeqytet.
Sipas ambasadorit Ajeti, ky fluks i madh i fluturimeve tregon për lidhjen e fortë të diasporës me vendlindjen gjatë sezonit veror. Ai theksoi se këto udhëtime nuk përfaqësojnë vetëm lëvizje të thjeshtë pasagjerësh, por luajnë një rol kyç në qarkullimin e kapitalit dhe njohurive mes dy vendeve.
Ambasadori shtoi se shumë ndërmarrës shqiptarë dhe gjermanë po e shfrytëzojnë këtë rrjet të dendur ajror për të zhvilluar takime biznesi paradite në Prishtinë dhe pasdite në Berlin apo qytete të tjera gjermane, duke lehtësuar kështu bashkëpunimin e drejtpërdrejtë ekonomik.
Burim: Zëri
— Redaksia ZHURMA
