Alarm për bombë në fluturimin Manchester-Tiranë, policia jep detajet
Policia e Shqipërisë jep detaje pas alarmit për bombë në avionin e linjës Manchester-Tiranë, ku u gjet një letër kërcënuese në tualet.
Redaksia ZHURMA · · 1 min lexim
Shërbimet e Policisë Kufitare u njoftuan rreth orës 19:30 nga menaxheri i aeroportit se gjatë uljes së avionit të linjës Manchester–Rinas, në tualetin e mjetit fluturues ishte gjetur një letër me mesazh kërcënues për shpërthim. Sipas policisë, mesazhi në fjalë ishte i shkruar në gjuhën angleze.
Pas marrjes së njoftimit, strukturat policore ndërhynë në pistë duke mundësuar zbritjen e kontrolluar të pasagjerëve. Më pas u krye kontrolli i detajuar i avionit, i bagazheve dhe i pasagjerëve përmes qenve antieksplozivë dhe skanerit të aeroportit, me qëllim identifikimin e sendeve që mund të lidhen me shkrimin e mesazhit.
Autoritetet bënë të ditur se gjatë kontrollit të plotë nuk u konstatua asnjë send apo lëndë shpërthyese. Për këtë ngjarje është vënë në dijeni struktura e Antiterrorit, ndërsa nën drejtimin e Prokurorisë po vazhdojnë veprimet hetimore për dokumentimin e plotë të rastit dhe identifikimin e personit që ka shkruar letrën.