Firmë padit penalisht kryetarin e Istogut, Ilir Ferati, për tender të bllokuar 308 ditë
Kompania thotë se prokurimi e ka "zhdukur" dokumentin DNPDF/B04 prej mbi 308 ditësh, ndërsa ligji lejon vetëm 30-50 ditë.
ISTOG — Kompania “NNP CTA SH.P.K.”, e rekomanduar si fituese e tenderit 593.213,14 euro për ndërtimin e Shtëpisë së Kulturës dhe Parkut në Vrellë, ka dorëzuar kallëzim penal në Prokurorinë Speciale kundër Kryetarit të Komunës së Istogut, Ilir Ferati, Zyrtarit Kryesor Financiar, Qëndrim Ibrahimaj, Drejtoreshës së Kulturës, Era Rexhaj, dhe zyrtarëve të tjerë përgjegjës.
Komisioni Vlerësues e kishte rekomanduar njëzëri shpërblimin e kontratës më 30 tetor 2025, por vendimi përfundimtar nuk u publikua kurrë. Sipas kallëzimit penal, procedura mbetet e bllokuar prej më shumë se 308 ditësh.
Operatori ekonomik pretendon se është “avulluar” Deklarata e Disponueshmërisë së Mjeteve Financiare (DNPDF/B04) — dokument pa të cilin kontrata nuk mund të nënshkruhet ligjërisht, sipas kallëzimit të dorëzuar në prokurori.
Afati ligjor maksimal për një procedurë të tillë është 30 deri në 50 ditë, sipas Nenit 40.3 të Rregullores së Prokurimit Publik. Zvarritja mbi 300-ditore, thotë kompania, i ka bllokuar garancionet bankare, stafin profesional e kapacitetet teknike, dhe e ka penguar edhe ankesën në OSHP.
Zyra e Prokurimit pretendon se e ka nënshkruar dokumentin dhe ia ka përcjellë Njësisë së Kërkesës. Kryetari Ferati, sipas kallëzimit penal, ka thënë se dokumentet është dashur të vinin nga prokurimi te zyra e tij — gjë që, thotë ai, nuk ka ndodhur.
Zyrtari Kryesor Financiar, Qëndrim Ibrahimaj, i ka thënë Insajderit se deri më 14 korrik 2026 s’ka pasur asnjë informacion, kur Zija Morina i është drejtuar personalisht duke kërkuar dokumentin DNPDF/B04. Ai u është drejtuar Menaxherit të Prokurimit për sqarime, por nuk ka marrë përgjigje.
Drejtoresha e Kulturës, Era Rexhaj, thotë se e ka marrë detyrën vetëm në mars 2026, pas nisjes së prokurimit, dhe se kërkesa e saj për dokumentin është refuzuar më 16 korrik me arsyetimin se s’ka dëshmi ku gjendet ai. Kryetari Ferati nuk iu përgjigj pyetjeve të Insajderit deri në publikim.
Burim: Insajderi
— Redaksia ZHURMA