Prizren Fest hap edicionin e pestë me artistë nga nëntë shtete

Në Prizren ka filluar edicioni i pestë i Festivalit Ndërkombëtar të Teatrit në Hapësirë të Hapur Prizren Fest. Festivali, i cili zhvillohet nga 21 deri më 27 korrik, sjell për publikun shfaqje teatrale, performanca, koncerte, shfaqje stand-up dhe punëtori artistike.

Nata hapëse e festivalit u organizua në sallën e Shtëpisë së Kulturës “Xhemajli Berisha” në Prizren. Në ceremoninë e hapjes morën pjesë u.d. e Presidentes së Kosovës Albulena Haxhiu, kryetari i Komunës së Prizrenit Shaqir Totaj, si dhe shumë të ftuar të tjerë të nivelit të lartë.

Shfaqja e parë e festivalit ishte performanca “Borderless Body” nga Sllovenia. Në kuadër të Prizren Fest do të prezantohen artistë nga Italia, Franca, Turqia, Maqedonia e Veriut, Brazili, Spanja, Kanadaja, Holanda, Shqipëria dhe Kosova.

Programi i festivalit përfshin shfaqje si “Darkness Picnic” nga Italia, “Souvenirs” nga Franca, “Mission Roosevelt” nga Franca, “Lysistrata” nga Turqia, “Babai” nga Maqedonia e Veriut, “Zanat Vocal Ensemble” nga Kosova, “A Scream in the Dark” nga Brazili, “Pylli” nga Kosova, “Mall / Longing” nga bashkëprodhimi Francë-Shqipëri, shfaqje stand-up komedi nga Kosova dhe “Última Planta” nga Spanja.

Në kuadër të festivalit, më 23 dhe 24 korrik në Teatrin e Qytetit “Bekim Fehmiu” do të organizohet edhe masterklasa e aktrimit me titull “The Guhelli Technique – Emotional Core Acting”. Organizatorët kanë bërë të ditur se të gjitha shfaqjet dhe aktivitetet e Prizren Fest janë falas dhe kanë ftuar të gjithë artdashësit që t’i bashkohen festivalit.

Burim: KultPlus, https://kultplus.com/teatri-e-artet-skenike-nga-nente-shtete-bashkohen-ne-prizren/
— Redaksia ZHURMA