Fero: Me kënaqësi do t'ia jepja një mundësi të dytë Arbenitës

Reperi Fero ka folur rreth marrëdhënies me ish-bashkëshorten e tij, modelen Arbenita Ismajli, duke zbuluar se si qëndrojnë raportet mes tyre pas ndarjes. I ftuar në emisionin «Live me Luizin» në Top Channel, ai u pyet për komunikimin e sotëm dhe tregoi se tashmë kanë arritur të krijojnë një raport të mirë, veçanërisht për hir të vajzës së tyre, Ninës. «Unë sot gëzoj një raport shumë të mirë me ish-bashkëshorten time, nënën e vajzës sime», u shpreh reperi, duke shtuar se synojnë ta ruajnë këtë komunikim.

Gjatë bisedës, moderatori Luiz Ejlli e pyeti se çfarë do të bënte ndryshe nëse do ta niste nga fillimi historinë e dashurisë. Fero pranoi se me kalimin e kohës njeriu kupton më mirë gabimet e veta. «Tani mund të them se nuk do ta bëja këtë, nuk do ta bëja atë, por ndonjëherë, për ta kuptuar që je gabim, duhet ta kalosh gabimin», deklaroi ai, duke shtuar se njerëzit gabojnë dhe se ka shumë gjëra që do të kishte dëshirë të kishin ndryshuar.

Historia e tyre ka qenë ndër më të komentuarat në showbizin shqiptar, e shoqëruar me akuza të ndërsjella dhe mosmarrëveshje pas ndarjes. Arbenita kishte bërë publike pretendime për dhunë fizike e psikologjike, tradhti dhe probleme të tjera gjatë marrëdhënies, të cilat Fero i kishte kundërshtuar. Përplasjet kishin vazhduar në rrjetet sociale dhe rrugë ligjore, ku një nga çështjet e ndjeshme ishin edhe takimet me vajzën.