Fero rrëfen takimin me të bijën në Dubai pas dy vitesh pa kontakt

Këngëtari Fero ka rrëfyer gjatë një paraqitjeje në emisionin «Live me Luizin» detajet e takimit me vajzën e tij në Dubai, pasi për dy vite nuk kishte pasur mundësi ta takonte apo të komunikonte me të në telefon. Ai tregoi se reagimi i tij i parë kishte qenë ta puthte në ballë, ndërsa kishte pasur frikë se mos e bija e kishte harruar.

Gjatë një periudhe prej dy vitesh, këngëtari nuk kishte pasur asnjë kontakt telefonik ose fizik me të bijën, situatë të cilën ai e përshkroi si më të vështirën në jetën e tij. Gjatë asaj kohe, ai kishte kërkuar ndihmë me anë të rrugëve gjyqësore dhe përmes rrjeteve sociale, duke pranuar se ngarkesa emocionale e kishte çuar edhe në gabime gjatë përpjekjeve për të realizuar të drejtën e tij si baba.

Sipas deklaratave të këngëtarit gjatë emisionit, marrëdhënia e tij me ish-bashkëshorten Arbenita Ismajli tashmë është përmirësuar dhe të dy ruanin një komunikim të mirë si prindër. Fero njoftoi se të dy po bashkëpunojnë për mirëqenien e vajzës që po rritet. Ai tha se ritakimi ndodhi në Dubai, ku vuri re se vajza kishte harruar gjuhën shqipe dhe fliste vetëm anglisht, gjë që e kishte mërzitur atë për nënën e tij, por shtoi se gjendja tashmë është përmirësuar.

Këngëtari u shpreh se lindja e vajzës kishte qenë ndjesia më e veçantë në jetën e tij dhe se ajo e kishte mësuar të bënte përpjekje të vazhdueshme për të ndryshuar veten. Ai falënderoi ish-bashkëshorten për raportin e tanishëm dhe kërkoi që të mos sulmohet apo etikohet nga të tjerët, me qëllim që të mos dëmtohet kontakti që ka vendosur me të bijën.

«Nuk më pëlqen të flas për njerëz që nuk janë prezentë, por unë e kuptoj ku do të dalësh ti, Luiz. Unë me nënën e vajzës sime gëzojmë një raport shumë të mirë. Duam që ta ruajmë këtë raport për hir të vajzës, e cila është duke u rritur», deklaroi ai.

«Ndjesia më e veçantë, që nuk ka fjalë për ta përshkruar, është kur e kam parë vajzën dhe e kam marrë në dorën time. Është një ndjenjë që nuk përshkruhet. Vajza më ka mësuar se unë çdoherë duhet të bëj përpjekje për të ndryshuar veten për të mirën time dhe të jem një shembull më i mirë për të», shtoi këngëtari.

«Për dy vite nuk e kam takuar dhe as nuk kam folur në telefon. Ka qenë periudha më e vështirë për mua, sepse ka qenë aq e vështirë si periudhë, saqë sa herë e kam marrë afër zemrës mungesën e vajzës dhe mos-takimin me të, për të mos folur për mungesën e komunikimit dhe mosdijeninë për jetën e vajzës», tha Fero gjatë rrëfimit.

«Kur e kam takuar për herë të parë, kam shkuar në Dubai. Kisha dy vite pa e parë dhe pa folur me të. Kur flas me të, kishte harruar shqipen fare dhe fliste vetëm anglisht. Aty u mërzita për mamanë time, por tani është mirë», përfundoi ai.