Ferati i propozon OEMVP-së modelin '25-25-25' për bashkëpunim
Nisma e prezantuar para kryetarit Nuhi Aliu synon të integrojë të gjitha bashkësitë etnike dhe të eliminojë pengesat administrative për bizneset.
SHKUP — Ministri për Marrëdhënie ndërmjet Bashkësive, Agon Ferati, i ka propozuar kryetarit të Odës Ekonomike të Maqedonisë Veri-Perëndimore, Nuhi Aliu, nënshkrimin e një Memorandumi për Bashkëpunim në formatin “25-25-25”. Ky model i ri synon të transformojë komunikimin mes institucioneve shtetërore dhe sektorit privat në një proces të rregullt.
Një rol kyç në zbatimin e këtij koncepti pritet të ketë Sektori për Analiza dhe Hulumtime. Ky sektor do të analizojë të gjitha pengesat administrative, ligjore apo procedurale me të cilat përballen bizneset, duke vlerësuar ndikimin e tyre dhe duke përgatitur rekomandime konkrete për Qeverinë.
Ministri Ferati theksoi se ky bashkëpunim nuk do të kufizohet vetëm në dialogun me bizneset shqiptare. Ai synon të jetë një platformë gjithëpërfshirëse për fuqizimin ekonomik të të gjitha bashkësive, duke ndihmuar veçanërisht grupet që kanë më pak qasje në informata dhe mbështetje zhvillimore.
Palët ndajnë qëndrimin se në zhvillimin ekonomik të vendit nuk duhet të ketë bashkësi etnike të padukshme. Përmes këtij modeli të ri, pritet të garantohen mundësi të barabarta dhe qasje e drejtë në informata apo kontakte institucionale për çdo komunitet.
Burim: Tetova Sot
— Redaksia ZHURMA