Mickoski: Kompanitë dhe avokatët sabotojnë qëllimisht tenderët

Kryeministri Hristijan Mickoski ka mbrojtur ndryshimet e reja ligjore, duke deklaruar se disa shoqëri avokatësh dhe kompani merren vesh qëllimisht për të dështuar procedurat e tenderimit me qëllim përfitimi financiar nga ankesat. Ai theksoi se përmes këtyre ndryshimeve pragu për furnizimet me negocim të drejtpërdrejtë, pa shpallje publike, është rritur nga 5.000 në 10.000 euro. Sipas tij, ligji i ri do të rrisë tarifën për ankesa dhe do të parandalojë situatat ku institucionet shpenzojnë më shumë para për procedurat sesa për vetë furnizimet.

Mickoski pranoi se Qeveria ka bërë gabim në pjesën e ligjit që parashikonte mandat të pakufizuar për anëtarët e komisionit, duke e arsyetuar me numrin e kufizuar të ekspertëve. Megjithatë, ai hodhi poshtë kritikat e ekspertëve dhe organizatave joqeveritare rreth uljes së transparencës. Ndërkohë, Kuvendi i Maqedonisë së Veriut miratoi amendamentin për shlyerjen e nenit 13 të Propozim-ligjit në kuadër të seancës së 129-të, në përputhje me udhëzimet e presidentes Gordana Siljanovska Davkova.