Rritet numri i pacientëve me viroza sezonale në Spitalin e Tetovës

TETOVË — Temperaturat e ndryshueshme të kësaj periudhe kanë sjellë një fluks më të madh të qytetarëve në ambulancat e Spitalit të Tetovës, të cilët kërkojnë ndihmë për shkak të virozave sezonale dhe gripit që karakterizojnë stinën e vjeshtës.

Sipas mjekut Bekim Ismaili, më të rrezikuar mbeten fëmijët për shkak të imunitetit më të dobët, si dhe personat me sëmundje kronike, ndërsa simptomat kryesore përfshijnë temperaturën e lartë, kollitjen dhe lodhjen. «Me ardhjen e stinës së vjeshtës dhe dimrit, ndryshon edhe patologjia e pacientëve që vijnë dhe kërkojnë ndihmë në ambulancat tona», tha ai, duke shtuar se rekomandohet konsumimi i lëngjeve dhe çajrave të ngrohtë.

Për të parandaluar komplikimet, mjekët apelojnë shmangien e ambienteve të mbyllura dhe mosdërgimin e fëmijëve të sëmurë në shkolla e çerdhe. Njëkohësisht, autoritetet shëndetësore vërejnë një rritje të interesimit për vaksinimin kundër gripit sezonal, i cili u këshillohet posaçërisht grave shtatzëna, punonjësve shëndetësorë dhe personave me sëmundje kronike.