Projekti i deponisë ndërmjet Vranishtës dhe Orçushës nxit reagime në Dragash

Planifikimi i deponisë së mbetjeve inerte ndërmjet fshatrave Vranishtë dhe Orçushë në lokacionin e Gorës ka nxitur kundërshtime dhe polemika të hapura ndërmjet përfaqësuesve politikë të komunitetit goran në Dragash. Reagimet vijnë pasi projekti për ndërtimin e këtij objekti për mbetje ndërtimore ka përplasur subjektet politike JGP dhe SDU lidhur me procedurat e ndjekura.

Më parë, projekti për ndërtimin e deponisë në pjesën e Opojës, më saktësisht në fshatin Rrenc, u tërhoq pas vërejtjeve të banorëve vendas dhe kritereve të ministrisë. Për lokacionin në Opojë po kërkohet një zgjidhje alternative ligjore dhe ekologjike, ndërsa prej vitesh mbeturinat komunale të gjithë Dragashit hidhen në deponinë ekzistuese në atë zonë.

Ish-asamblisti i Kuvendit Komunal të Dragashit, Nexhmidin Sejdilar, kundërshtoi vendosjen e deponisë ndërmjet Vranishtës dhe Orçushës përmes një postimi në rrjetet sociale. Ai kritikoi qeverisjen lokale, si dhe subjektet JGP dhe SDU për mungesë angazhimi në mbrojtje të banorëve. Sejdilar kërkoi publikimin e dokumentacionit të plotë të projektit, vlerësimet për ndikimin në mjedis dhe shëndet, organizimin e një debati publik dhe pezullimin e punimeve.

Zëvendëskryesuesi i Kuvendit Komunal të Dragashit nga Partia Unike Gorane (JGP), Danis Hoxha, deklaroi se nuk është konsultuar dhe as nuk ka qenë i përfshirë në bisedimet apo vendimmarrjen për këtë projekt të financuar përmes Grantit të Performancës. Hoxha theksoi se ky projekt konkret nuk është shqyrtuar dhe as miratuar me votim në Kuvendin Komunal. Ai kërkoi verifikimin e fakteve, shqyrtimin e ndikimeve mjedisore dhe mbajtjen e një debati publik para çdo vendimi përfundimtar.

Nga ana tjetër, Socijaldemokratska Unija (SDU) njoftoi përmes një komunikate se vendimi për caktimin e dy lokacioneve për mbetje ndërtimore, një në Opojë dhe një në Gorë, është marrë bashkërisht në Bordin e Drejtorëve me votat e drejtorëve të JGP-së. SDU e cilësoi reagimin e JGP-së si të njëanshëm dhe vuri në pikëpyetje konsistencën e këtij subjekti që udhëheq pozita kyçe, përfshirë Drejtorinë e Shërbimeve Publike, nënkryetarin për komunitete dhe kryesimin e Komitetit për Komunitete. Ndaj kësaj komunikate reagoi sërish Hoxha, duke e cilësuar të papërgjegjshme përpjekjen për të bartur përgjegjësinë te këshilltarët e JGP-së.

Përfaqësuesit e përfshirë në këtë debat kanë kërkuar që para marrjes së vendimeve të organizohet një debat publik me banorët e zonës për të shqyrtuar ndikimin mjedisor.