FC Vushtrria reagon pas bojkotit të futbollistëve ndaj Ballkanit

VUSHTRRI — Klubi i Futbollit Vushtrria ka reaguar zyrtarisht pas bojkotit të një grupi futbollistësh që refuzuan të luajnë në ndeshjen kundër Ballkanit. Bordi drejtues i klubit nga qyteti i Vushtrrisë pranoi se ekziston një vonesë 20-ditore në ekzekutimin e pagës së fundit për lojtarët e ekipit të parë, por theksoi se bojkoti vendos klubin në situatë të vështirë.

Kriza financiare dhe administrative te FC Vushtrria u shpërfaq hapur para përballjes me Ballkanin, pasi futbollistët vendosën të mos zbrisnin në fushë. Sipas njoftimeve zyrtare, një natë para sfidës u zhvillua një takim i përbashkët ku morën pjesë drejtuesit e klubit, futbollistët dhe përfaqësuesit e tifogrupit “Forca”. Gjatë këtij diskutimi, bordi drejtues u kishte premtuar lojtarëve se ekzekutimi i pagave do të bëhej brenda javës së ardhshme, pasi dokumentacioni i nevojshëm financues ishte kompletuar gjatë javës.

Në njoftimin e publikuar në faqen zyrtare në Facebook, bordi i FC Vushtrrisë sqaroi se vonesa prej 20 ditësh është shkaktuar nga procedurat ligjore për sigurimin e vërtetimeve të sponsorizimit. Drejtuesit deklaruan se kjo është vonesa e parë e këtij lloji që nga hyrja e klubit në Superligë dhe morën përgjegjësinë për këtë situatë. Klubi shtoi se përfaqësuesve të tifogrupit “Forca” u ishte premtuar gjithashtu shlyerja e një detyrimi që lidhet me organizimin e tyre të brendshëm. Megjithatë, futbollistët nuk pranuan të paraqiten në lojë, duke rrezikuar humbjen e ndeshjes në tavolinë. Drejtuesit vlerësuan se FC Vushtrria ka qenë ndër klubet me më së paku vonesa në përmbushjen e obligimeve financiare dhe theksuan se me mbështetjen e bizneseve më të fuqishme të qytetit pritet të krijohen kushte më të qëndrueshme për funksionimin e mëtejshëm.

Bordi drejtues bëri të ditur se ngjarja do të trajtohet me seriozitet të plotë dhe në përputhje me rregulloret e brendshme si dhe legjislacionin në fuqi për të vlerësuar përgjegjësitë e secilës palë. Drejtuesit paralajmëruan se vendimet do të merren mbi bazën e rregulloreve disiplinore, ndërsa vlerësuan se kompletimi i dokumentacionit të sponsorizimit gjatë kësaj jave përbën një hap me rëndësi për stabilizimin e gjendjes financiare në vazhdim.

Sipas reagimit zyrtar të publikuar nga FC Vushtrria, situata e krijuar mbetet e dëmshme për të gjitha palët e përfshira: «Është për keqardhje ajo që ka ndodhur sot me klubin tonë. Situata e krijuar nuk është në interes të askujt dhe ka ardhur si pasojë e bojkotit të një grupi lojtarësh, të cilët, pavarësisht diskutimeve dhe zotimeve të dhëna, nuk pranuan të paraqiten në ndeshjen e sotme. Çështjet e brendshme të klubit duhet të zgjidhen përmes dialogut dhe mirëkuptimit, pa e dëmtuar klubin». Më tej, në reagimin e tyre, drejtuesit nëvizuan se organizata qëndron mbi çdo individ: «FC Vushtrria është mbi interesat individuale». Klubi e përmbylli deklaratën e tij me një mesazh prerës ndaj bojkotuesve: «Klubi nuk shantazhohet nga askush».