Superliga e Kosovës vazhdon sot me dy ndeshjet e javës së njëmbëdhjetë

Java e njëmbëdhjetë e Albi Mall Superligës së Kosovës vazhdon me dy përballje interesante që mund të sjellin ndryshime në renditjen tabelare. Ndeshja e parë nis nga ora 14:00, ku Vushtrria del si nikoqire kundër Ballkanit. Skuadra mysafire konsiderohet favorite në këtë duel, duke pasur parasysh vështirësitë financiare të Vushtrrisë dhe bojkotin e ndërmarrë nga lojtarët vendas.

Nga ora 18:00, në stadiumin «Bajram Aliu» në Skenderaj, Drenica e pret lideren e kampionatit, Malishevën. Vendasit synojnë të shfrytëzojnë përparësinë e terrenit për t'ia vështirësuar punën kundërshtarit dhe për të marrë pikë të rëndësishme. Megjithatë, Malisheva po kalon një sezon të shkëlqyer dhe kryeson tabelën me 23 pikë nga dhjetë ndeshje, duke mbajtur pikë të barabarta me Prishtinën. Java do të përmbyllet të dielën me takimet Feronikeli ’74 – Dukagjini dhe Prishtina – Drita.