Kombëtarja e Kosovës në hendboll nis kualifikimet për Botëror ndaj Estonisë

Kombëtarja e Kosovës në hendboll në konkurrencën e vajzave nis sot kualifikimet për Kampionatin Botëror me përballjen e parë ndaj Estonisë nga ora 20:00 në Pallatin e Rinisë në Prishtinë, për të synuar kalimin në raundin e fundit kualifikuese.

Përpjekja e tanishme e përfaqësueses vjen pas dy kampanjave të kaluara ku ekipi kosovar arriti të kalojë me sukses raundin e parë kualifikues. Gjatë kualifikimeve për Botërorin e vitit 2023, Kosova luajti dy ndeshje kundër Ishujve Faroe në Palestrën e Sporteve në Istog. Në përballjen e parë të zhvilluar më 3 nëntor 2022, skuadra vendëse fitoi me rezultatin 27:24, ndërsa dy ditë më pas u mposht me shifrat 29:28. Kjo ecuri i mjaftoi Kosovës për të kaluar tutje, ku më pas u ndalua nga Polonia. Po ashtu, për Botërorin e vitit 2025, ekipit kosovar i eci mbarë faza grupore e raundit të parë që u mbajt në Hasselt të Belgjikës. Më 25 tetor 2024, Kosova korri fitore ndaj Belgjikës me shifrat 32:28, si dhe triumfoi një ditë më vonë kundër Bosnjë-Hercegovinës me rezultatin 32:26, përpara se të eliminohej nga Suedia në raundin e dytë kualifikues.

Sipas të dhënave zyrtare për ndeshjet e këtij raundi, dueli i dytë ndërmjet Kosovës dhe Estonisë do të zhvillohet të shtunën, duke filluar nga ora 17:00, po ashtu në Pallatin e Rinisë në Prishtinë. Në prag të këtyre sfidave, Kombëtarja A e Kosovës ka zhvilluar stërvitjen e saj të parë të hënën mbrëma, ku nën udhëheqjen e selektorit Nenad Shoshtariq morën pjesë shumica e lojtareve të ftuara për këtë grumbullim. Ekipi kosovar futet në këtë përballje me statusin e favoritit përballë Estonisë, por do t'i duhet përqendrim i plotë në të dyja takimet për ta konfirmuar këtë epitet në fushë.

Kombëtarja që do të tregohet më e suksesshme pas përfundimit të dy ndeshjeve në kryeqytet do të sigurojë biletën për në raundin e fundit kualifikues për Kampionatin Botëror të vitit të ardhshëm. Krahas ekipit përfaqësues A, javë angazhimesh do të ketë edhe për grupmoshat e reja, ku Kombëtarja U16 e vajzave përballet me Bullgarinë në kuadër të garës së re regjionale për hendbolliste, ndërsa hendbollistet e Kombëtares U17 janë grumbulluar të martën në Prishtinë për të nisur sfidat e tyre në këtë iniciativë të re sportive.