Rama: Qeveria nuk rrëzohet me dhunë

Kryeministri Edi Rama deklaroi se qeveria nuk rrëzohet me dhunë, teksa komentoi protestat e ditëve të fundit për kushtet e jetesës në Tiranë. Kreu i ekzekutivit theksoi se protesta paqësore është një e drejtë demokratike që duhet garantuar, ndërsa paralajmëroi masa ligjore ndaj personave që kryejnë akte dhune dhe paralajmëroi propozime të shpejta për përballimin e jetesës së shtrenjtë.

Ndërhyrja e kryeministrit vjen pas tubimeve të zhvilluara për katër muaj me rradhë përballë zyrës së tij, ku qytetarët kanë ngritur shqetësime për koston e lartë të jetesës, qiratë e apartamenteve dhe çmimet në kryeqytet. Gjatë kësaj periudhe, Policia e Shtetit ka ndaluar dhe proceduar persona të përfshirë në ngjarje të dhunshme, ndërsa autoritetet shtetërore kanë koordinuar veprimet me partnerët ndërkombëtarë për të ruajtur rendin publik.

Gjatë një komunikimi për mediat, Rama bëri të ditur se Ministri i Brendshëm ka zhvilluar një vizitë pune jashtë vendit për të ndarë përvojën dhe për të koordinuar veprimet me homologët në Itali dhe në Francë, lidhur me aktivitetin e grupeve të radikalizuara. Sipas kryeministrit, Policia e Shtetit ka identifikuar dhe proceduar një listë personash me precedentë kriminalë, të cilët ishin maskuar si studentë pa pasur asnjë lidhje me statusin e tyre. Rama deklaroi se pas këtyre individëve qëndrojnë krimi i organizuar dhe faktorë të jashtëm për të cilët po zhvillohen hetime me intensitet. Ai sqaroi se në shesh janë shfaqur persona të radikalizuar nga lëvizja ANTIFA, elementë të nxitur për dasi fetare dhe individë me precedentë penalë, të cilët kanë ushtruar terror urban dhe dhunë.

Sa i përket anës sociale, kryeministri njoftoi se qeveria do të dalë shumë shpejt me propozime dhe masa konkrete për të lehtësuar koston e jetesës dhe problemin e strehimit në Tiranë. Rama sqaroi se do të ketë masa të koordinuara për të ndihmuar familjet përballë çmimeve të rritura dhe qirasë së lartë të apartamenteve.

Lidhur me përpjekjet për dialog, Rama tregoi se ka zhvilluar një bisedë telefonike me një pedagog të Universitetit të Mjekësisë, me të cilin ka diskutuar për nevojën e bisedimeve dhe zgjidhjen e problematikave. Kryeministri po ashtu nëmëroi reagimin e disa mediave për mbrojtjen e elementëve të dhunshëm dhe u shpreh se gjatë muajve të protestës ka dëgjuar vetëm fyerje pa asnjë kërkesë të strukturuar. Sipas tij, protesta paqësore është rruga e vetme që çon te dialogu dhe garantimi i sigurisë për vendin.