Ikarus dhe EVN fitojnë tenderin në Shkup — 150 autobusë elektrikë
Konsorciumi hungarezo-austriak do të sigurojë edhe 75 stacione karikimi, pasi tenderi i kaluar u anulua nga Komisioni i Ankesave.
SHKUP — Kompania hungareze “Ikarus Electric Zrt” dhe ajo austriake “EVN”, përmes një oferte të përbashkët konsorciumi, kanë fituar tenderin e përsëritur për furnizimin e 150 autobusëve elektrikë dhe 75 stacioneve të karikimit. Ministria e Transportit njoftoi se oferta e tyre me vlerë rreth 51 milionë euro u përzgjodh si më e favorshmja në ankandin elektronik.
Ky vendim vjen pasi procedura e mëparshme e tenderit u anulua nga Komisioni Shtetëror për Ankesa në Prokurimet Publike. Në thirrjen publike fillimisht morën pjesë katër kompani, por pas vlerësimit të dokumentacionit vetëm prodhuesi turk BMC dhe konsorciumi fitues Ikarus-EVN i plotësuan kriteret për të marrë pjesë në ankand.
Në ankandin elektronik, konsorciumi ofroi çmimin prej rreth 322 mijë eurosh për autobus dhe 33 mijë eurosh për stacion karikimi, pa llogaritur TVSH-në. Pas këtij propozimi zyrtar nga komisioni përkatës, tani fillon afati ligjor prej dhjetë ditësh për paraqitjen e ankesave nga ofertuesit e tjerë.
Burim: Almakos
— Redaksia ZHURMA