Sa kushtoi buxhetit të Maqedonisë së Veriut dyfishimi i ndihmës sociale me pension?
ESHR konstaton 235 persona që morën njëkohësisht të dyja përfitimet — 236 mijë euro pa bazë ligjore.
SHKUP — Enti Shtetëror i Revizionit ka zbuluar lëshime sistemike në pagesat e mbrojtjes sociale për periudhën 2022–qershor 2025, duke konstatuar se 235 persona kanë përfituar njëkohësisht edhe ndihmë sociale edhe pension.
Pa asnjë bazë ligjore, këtyre personave u janë paguar 14,5 milion denarë, ose 236 mijë euro. Sipas raportit të ESHR-së, 190 përdorues morën 10,7 milion denarë në bazë të ndihmës sociale, 40 të tjerë 3,3 milion denarë në bazë të sigurisë sociale për të moshuar, dhe 5 persona 426 mijë denarë në bazë të ndihmës së përjetshme.
Revizorët kanë identifikuar dobësi në kontrollet sistemore, dokumentacion jo të plotë, vonesa procedurale dhe shkëmbim të dhënash joefikas mes institucioneve. Qendrat për punë sociale nuk kanë ndjekur në mënyrë efikase kthimin e pagesave të pa baza. Po ashtu, Qendra Sociale Ndërkomunale dhe Agjencia për Punësim nuk zbatojnë detyrimin ligjor për përpunim elektronik të planeve individuale për aktivizimin e papunëve — ato përpunohen kryesisht manualisht, pa koordinim funksional mes institucioneve.
ESHR paralajmëron se këto gjendje rrezikojnë harxhim jo racional të fondeve publike dhe ulin efikasitetin e sistemit. Si zgjidhje, propozohet përmirësimi i kornizës ligjore, kontrolleve dhe koordinimit ndërinstitucional.
Burim: Almakos, https://almakos.com/235-persona-kane-marre-edhe-ndihme-sociale-edhe-pension-demi-ne-buxhet-236-mije-euro/
— Redaksia ZHURMA