Motoçiklisti Esat Fejzaj humbet jetën në përplasje me kamion në Istog
Aksidenti ndodhi të hënën rreth orës 12:17 në rrugën Bellopojë–Tuçep, pasi 49-vjeçari humbi kontrollin në një kthesë dhe kaloi në korsinë e kundërt.
ISTOG — Një aksident i rëndë trafiku me pasojë vdekjen ndodhi paraditen e së hënës në fshatin Bellopojë të Istogut, ku një motoçiklist humbi jetën pasi u përplas me një kamion për bartjen e mbeturinave. Sipas burimeve të Sinjalit, viktima është Esat Fejzaj, rreth 49 vjeç, i cili drejtonte vetë motoçikletën e përfshirë në aksident.
Aksidenti ndodhi rreth orës 12:17, në rrugën që lidh Bellopojën me Tuçepin, në drejtim të deponisë së mbeturinave. Sipas dyshimeve të para të hetuesve, Fejzaj ka humbur kontrollin mbi motoçikletën gjatë kalimit nëpër një kthesë, nuk ka arritur ta mbajë shiritin e vet të lëvizjes dhe ka kaluar në korsinë e kundërt, ku u përplas ballë për ballë me kamionin që po qarkullonte nga drejtimi i kundërt.
Si pasojë e plagëve të marra, Esat Fejzaj ka ndërruar jetë në vendin e ngjarjes; vdekja e tij u konstatua nga ekipi mjekësor i dërguar në vendngjarje. Aty dolën edhe njësitë policore, ndërsa Prokurori i Shtetit urdhëroi që trupi i tij të dërgohej në Institutin e Mjekësisë Ligjore për obduksion.
Hetimet për zbardhjen e plotë të rrethanave të aksidentit janë duke u zhvilluar nga Njësia Rajonale e Hetimit të Aksidenteve në Pejë.
Burim: Sinjali
— Redaksia ZHURMA