Epidemia në Gostivar po stabilizohet, shqetësimet për Hepatitin A dhe E
Ministri i Shëndetësisë thotë se 80-125 raste të reja regjistrohen çdo ditë, ndërsa fokusi kalon te rreziku i Hepatitit A dhe E dhe i viruseve të tjera.
GOSTIVAR — Faza akute e epidemisë në Gostivar po stabilizohet gradualisht, thotë ministri i Shëndetësisë Sasho Klekovski. Fokusi i autoriteteve po zhvendoset në fazën post-akute, gjegjësisht mundësinë e paraqitjes së Hepatit A dhe E, si dhe të viruseve të tjera.
Në katër ditët e fundit, siç informoi ministri, numri i rasteve të reja në Gostivar ka lëvizur ndërmjet 80 dhe 125 në ditë. Për momentin nuk mund të përcaktohet saktësisht se sa prej këtyre rasteve lidhen drejtpërdrejt me epideminë.
Sipas të dhënave të Ministrisë së Shëndetësisë, në 24 orët e fundit edhe 110 persona kanë kërkuar ndihmë mjekësore në Gostivar. Ministri i bëri apel mjekëve amë të ndjekin gjendjen shëndetësore të pacientëve në periudhën në vijim, duke siguruar se institucionet shëndetësore janë të përgatitura për testim dhe trajtim.
Klekovski premtoi transparencë të plotë, duke thënë se do të publikojnë të dhëna nga 1 qershori deri tani për 12 vitet e kaluara. Ndërsa opozita LSDM e ka kërkuar dorëheqjen e ministrit, ai tha se nëse rezulton se ka pasur bazë për të reaguar, të gjithë do të mbajnë përgjegjësi.
Burim: Shenja
— Redaksia ZHURMA