Pse u arrestua Emiljan Burba?
SPAK-i njofton se Burba dyshohet për trafikim ndërkombëtar të drogës me mbi 2.4 ton lëndë narkotike të sekuestruara
TIRANË — SPAK ka njoftuar arrestimin e shtetasit shqiptar Emiljan Burba, i dyshuar si një nga drejtuesit e një grupi të strukturuar kriminal të përfshirë në trafikun ndërkombëtar të lëndëve narkotike. Sipas SPAK, hetimet për procedimin penal të regjistruar në janar të vitit 2024 janë zhvilluar në bashkëpunim me autoritetet europiane të drejtësisë, Byronë Kombëtare të Hetimit, Policinë Kriminale, si dhe me mbështetjen e Eurojust dhe Europol.
Nga hetimet ka rezultuar se grupi kriminal organizonte trafikimin e drogës nga Shqipëria drejt Malit të Zi me destinacion final Gjermaninë, nga Shqipëria drejt Turqisë, si edhe nga vendet e Amerikës së Jugut drejt vendeve të Bashkimit Europian. Një pjesë e provave është siguruar përmes analizës së komunikimeve të zhvilluara në platformën Sky ECC, të administruara nga autoritetet franceze në kuadër të bashkëpunimit juridik ndërkombëtar.
Sipas dosjes hetimore, janë dokumentuar tre raste të rëndësishme të trafikut ndërkombëtar të drogës: Më 3 nëntor 2020, autoritetet e Malit të Zi sekuestruan 1,722 kilogramë marijuanë, që ishte transportuar nga Shqipëria me destinacion Gjermaninë. Më 26 janar 2021, autoritetet turke bllokuan 236 kilogramë marijuanë, të nisura nga Shqipëria drejt Turqisë. Më 23 nëntor 2020, autoritetet holandeze sekuestruan 475 kilogramë kokainë në portin e Vlissingen, ngarkesë që kishte mbërritur nga Ekuadori.
Me vendim të Gjykatës së Posaçme të datës 3 korrik 2026, ndaj Emiljan Burbës u caktua masa e sigurisë “arrest në burg”, e cila u ekzekutua më 6 korrik nga strukturat e Policisë së Shtetit. Burba akuzohet për veprat penale “Trafikim i lëndëve narkotike”, kryer në kuadër të një grupi të strukturuar kriminal, “Grup i strukturuar kriminal” dhe “Kryerje e veprave penale nga organizata kriminale ose grup i strukturuar kriminal”.
SPAK bën të ditur se hetimet vijojnë për identifikimin dhe dokumentimin e rolit të personave të tjerë që dyshohet se janë përfshirë në këtë rrjet kriminal ndërkombëtar të trafikut të drogës.
Burim: Top Channel, https://top-channel.tv/2026/07/07/trafiku-nderkombetar-i-droges-spak-arreston-drejtuesin-e-grupit-kriminal-dokumentohen-tre-episode-me-mbi-2-4-ton-lende-narkotike-te-sekuestruara/
— Redaksia ZHURMA