Emigrantët shqiptarë në Greqi rrezikojnë pensione prej 300 deri 400 eurosh
Legjislacioni grek që kërkon 40 vjet qëndrim të ligjshëm po u redukton pensioneve shumat për mijëra shqiptarë që punuan me dekada.
Redaksia ZHURMA · · 2 min lexim
Mijëra emigrantë shqiptarë që kanë jetuar dhe punuar për dekada në Greqi po përballen me pasiguri financiare në prag të pensionimit, ku shumë prej tyre rrezikojnë të marrin vetëm 300 deri në 400 euro në muaj, raportoi media greke TVXS.
Kjo situatë prek veçanërisht gjeneratën e parë të emigrantëve shqiptarë, shumica e të cilëve mbërritën në shtetin fqinj gjatë viteve 1990. Ata kanë punuar për dekada në sektorë si bujqësia, ndërtimtaria, pastrimi i shtëpive dhe përkujdesja ndaj të moshuarve, duke dhënë kontribut të vazhdueshëm në ekonominë greke.
Pengesa kryesore lidhet me legjislacionin grek, i cili kërkon 40 vjet qëndrim të ligjshëm dhe të përhershëm në Greqi për të përfituar pensionin e plotë kombëtar, ndërsa për çdo vit që mungon nga ky kriter, shuma reduktohet proporcionalisht. Legjislacioni parashikon një trajtim të veçantë për personat me origjinë greke përmes një skeme kalimtare që nis nga 30 vjet qëndrim i ligjshëm, por kjo dispozitë nuk aplikohet për emigrantët e tjerë. Gjithashtu, punësimi i padeklaruar ka bërë që shumë punonjës të mos sigurojnë numrin e nevojshëm të kontributeve, një problem ky mjaft i theksuar te gratë që kanë punuar në shtëpi private pa u regjistruar në sistemin e sigurimeve shoqërore.
Aktivisti për të drejtat e emigrantëve, A.Q., 62-vjeçar, i cili jeton në Greqi nga viti 1992, tregon se shumë gra shqiptare kanë pastruar e janë kujdesur për të moshuarit pa sigurime shoqërore, çka po u pamundëson sot marrjen e një pensioni të dinjitetshëm. Nderkaq, Flori nga Iniciativa e Emigrantëve Shqiptarë dhe Solidarëve deklaroi se pasiguria u bë e dukshme me daljen në pension të prindërve të gjeneratës së parë, ndërsa shtoi se përfituesit që arrijnë të marrin 600 euro konsiderohen ndër më me fat.
Përfaqësuesit e komunitetit shqiptar kërkojnë ndryshimin e kushtit prej 40 vjetësh qëndrim të ligjshëm si dhe nënshkrimin e marrëveshjeve ndërmjet Greqisë dhe vendeve të origjinës për njohjen e ndërsjellë të viteve të punës dhe kontributeve pensionale.
Pyetje e përgjigje
Pse rrezikojnë shqiptarët në Greqi pensione aq të ulëta?
Ligji grek kërkon 40 vjet qëndrim të ligjshëm për pension të plotë. Për çdo vit që mungon, shuma reduktohet, ndërsa shumë punëtorë kanë pasur edhe periudha të padeklaruara pune.
Çfarë kërkojnë përfaqësuesit e komunitetit shqiptar?
Ata kërkojnë ndryshimin e kriterit prej 40 vjetësh qëndrim dhe arritjen e marrëveshjeve ndërmjet dy shteteve për njohjen e bashkuar të viteve të punës dhe kontributeve.
Lexo edhe
Më shumë →Koleksione · të dhëna të verifikuara
Vazhdo me më të lexuarat sot
Përditësuar