Fshehu shtëpinë dhe pensionin në Kosovë, Austria ia ndal socialin

Autoritetet në qytetin e Welsit ia kanë ndërprerë ndihmën sociale një personi që kishte fshehur pronën dhe pensionin në Kosovë, duke i kërkuar gjithashtu kthimin e afro 9 mijë eurove, shumë e cila sipas njoftimit zyrtar të publikuar më 2 nëntor 2026 tashmë është shlyer me këste.

Sipas Komunës së Welsit, dyshimet e para lindën pasi zyrtarët komunalë kishin shkuar disa herë për kontroll në banesën e përfituesit në Austri, por nuk e kishin gjetur aty, ndërsa verifikimet e mëtejshme zbuluan se ai zotëronte një shtëpi në Kosovë dhe përfitonte pension atje pa i deklaruar pranë institucioneve austriake.

Si pasojë e këtyre gjetjeve, autoritetet vendosën t'ia ndërpresin ndihmën sociale dhe ta denonconin rastin tek organet përkatëse, ndërsa në njoftimin zyrtar thuhet se «pas disa vizitave në banesë, gjatë të cilave personi nuk u gjet, u konstatua se ai zotëronte një shtëpi në Kosovë dhe merrte atje edhe pension, pa i deklaruar këto pranë autoriteteve».

Komuna e Welsit ka bërë të ditur se deri në fund të shtatorit të këtij viti janë realizuar gjithsej 97 kontrolle në banesat e përfituesve të ndihmës sociale, të cilat kryhen në mënyrë të rastësishme ose pas informatave të pranuara, ku zyrtarët verifikojnë adresat e banimit, pasurinë e deklaruar, të ardhurat dhe qëndrimet e gjata jashtë Austrisë, duke evidentuar gjithashtu një rast tjetër të një përfituesi që qëndronte për javë të tëra në Turqi.

Kryetari i Welsit, Andreas Rabl, ka thënë se institucionet mbajnë përgjegjësi që mbështetja financiare të shkojë tek personat që i plotësojnë kushtet ligjore dhe se keqpërdorimet do të ndalohen, duke deklaruar se «ne i ndihmojmë të gjithë ata që vërtet kanë nevojë për mbështetje, ndërsa keqpërdorimin e ndihmave sociale e ndalim».