Edon Zhegrova shpreh pakënaqësi te Juventusi për minutat e pakta

Edon Zhegrova nuk është i kënaqur me hapësirën që po i jepet te Juventusi dhe kërkon një rol më të rëndësishëm në skuadrën që drejtohet nga Luciano Spalletti. Futbollisti kosovar synon të luajë si titullar dhe të shmangë hyrjen në fushë vetëm në minutat e fundit, ndërkohë që Fabrizio Romano bën të ditur se lojtari beson se e ka dëshmuar vlerën e tij sa herë është aktivizuar nga stoli. Shifrat tregojnë se ai ka regjistruar nëntë paraqitje në Serie A këtë edicion, të gjitha si zëvendësues, duke mbërritur në kuotën e 249 minutave. Prej transferimit të tij nga Lille në Torino para një viti e gjysmë, anësori nuk e ka nisur ende asnjë ndeshje kampionati nga minuta e parë.

Pavarësisht minutave të pakta, kontributi i tij ka qenë i dukshëm me dy gola dhe dy asistime në Serie A, ku veçohet asistimi për Kerim Alajbegovicin në fitoren kundër Napolit dhe harkimi për Douglas Luizin në barazimin ndaj Fiorentinës. Romano thekson se zhvillimet rreth tij duhet të ndiqen me vëmendje në prag të afatit kalimtar të janarit, ndërsa TuttoJuve njofton se klubi italian mund ta nxjerrë lojtarin në treg dhe të shqyrtojë ofertat e përshtatshme për të reduktuar numrin e futbollistëve. Aktualisht, Zhegrova është i bashkuar me Përfaqësuesjen e Kosovës për ndeshjet e nëntorit kundër Izraelit dhe Irlandës.