Gzim Selmani triumfon në Glasgow dhe merr përgëzime nga McGregor

Boksieri shqiptar Gzim Selmani, i njohur me nofkën «The Albanian Psycho», ka regjistruar fitoren e dytë në boksin pa doreza (Bare Knuckle Fighting) pasi mposhti Reece Heerin në eventin BKFC 96, të mbajtur në Glasgow të Skocisë, duke triumfuar me vendim unanim të gjyqtarëve me rezultat 50-43.

Rrugëtimi i Selmani në sportet luftarake përfshin periudhën kur ai u bë i njohur në WWE me emrin Rezar, si pjesë e ekipit «Authors of Pain», me të cilin fitoi tituj ekiporë në NXT dhe WWE, ndërsa në karrierën e tij në MMA regjistroi katër fitore dhe dy humbje para se të kalonte në BKFC.

Gjatë përballjes në tokën skoceze, Selmani e rrëzoi kundërshtarin dy herë, duke e dominuar duelin dhe duke ruajtur rekordin e pastër në këtë organizatë, sipas të dhënave nga ngjarja. Pas përfundimit të ndeshjes, bashkëpronari i BKFC-së, Conor McGregor, shkoi për ta përshëndetur dhe përgëzuar Selmanin, ndërsa prania e tij u cilësua si një tjetër shenjë e vlerësimit që boksieri shqiptar po merr brenda organizatës.

Interesimi i irlandezit për rrugëtimin e shqiptarit ka nisur që nga debutimi i tij në muajin mars, kur Selmani e mposhti Daniel Curtinin me nokaut teknik në raundin e dytë, pasi e kishte rrëzuar kundërshtarin katër herë. Në deklaratat e tij pas BKFC 96, bashkëpronari i organizatës foli me entuziazëm për mbrëmjen, duke thënë: «Çfarë mbrëmjeje! Nuk jam i befasuar. Si McGregor, e di çfarë do të thotë të jesh në këtë vend. Nuk do ta humbisja për asgjë mundësinë për të qenë në tokën skoceze».

Me këtë sukses dhe me rekord prej 2-0 në BKFC, Selmani po ndërton një kapitull të ri në karrierë, ndërsa sipas vlerësimeve të deritanishme, këtij boksieri po i përshtatet ky stil dhe pritet të ketë një karrierë mbresëlënëse në të ardhmen.