Dr. Nehat Uruçi nderohet me mirënjohje për protetikën stomatologjike

Stomatologu Nehat Uruçi është nderuar me mirënjohje nga Shoqata e Protetikës Stomatologjike të Republikës së Kosovës më 7 nëntor 2026 në Prishtinë. Ky vlerësim i është ndarë atij për përkushtimin në zhvillimin e protetikës stomatologjike, ndarjen e njohurive dhe mbështetjen e veprimtarisë shkencore e profesionale të shoqatës.

Dr. Nehat Uruçi i përket gjeneratës së parë të stomatologëve shqiptarë të Anamoravës, të cilët filluan të hapnin rrugën e zhvillimit të shërbimeve stomatologjike në këtë rajon gjatë viteve të tetëdhjeta. Rrugëtimi i tij arsimor nisi në vendlindje dhe vazhdoi në shkollën e mesme të mjekësisë në Prishtinë në drejtimin teknik i dhëmbëve. Studimet universitare në Fakultetin e Mjekësisë, drejtimi Stomatologji, ai i përfundoi në vitin 1982. Më pas, Uruçi vazhdoi ngritjen profesionale me specializimin për protetikë stomatologjike në Universitetin e Sarajevës, të cilin e kreu në vitin 1992.

Mirënjohja e ndarë mban nënshkrimin e kryetarit të Shoqatës së Protetikës Stomatologjike të Republikës së Kosovës, Prof. Dr. Agim Islami. Nga viti 1982 deri më 1993, Uruçi punoi në Shtëpinë e Shëndetit në Gjilan, ndërsa pas vitit 1993 e ushtroi veprimtarinë e tij në ordinancën specialistike «Protetika» po në Gjilan. Përveç punës klinike, ai ka marrë pjesë në dy kongrese shkencore në nivel të ish-Jugosllavisë me punime shkencore që kur ishte student, si dhe ka qenë pjesëmarrës në kongrese të shumta në nivel evropian gjatë karrierës së tij si stomatolog.

Duke e ndarë këtë vlerësim me publikun, Dr. Nehat Uruçi shprehu mirënjohjen e tij ndaj Shoqatës së Protetikës Stomatologjike të Republikës së Kosovës, duke e quajtur atë një nder të veçantë dhe vlerësim për punën e tij shumëvjeçare. Ai kujtoi se gjenerata e parë e stomatologëve shqiptarë në Anamoravë punoi mes sfidave të shumta, rrethanave të rënda politike dhe presionit të agresionit serb, duke krijuar mundësi për brezat e ardhshëm dhe duke kontribuar në shëndetin oral të popullatës.