Si synon Dogana e Kosovës të integrohet në Tregun Unik të BE-së?
Drejtori i Doganës, Agron Llugaliu, kërkon anëtarësimin teknik në Konventën e Tranzitit të Përbashkët dhe zgjerimin e shkëmbimit elektronik të të dhënave.
ATHINË — Drejtori i Përgjithshëm i Doganës së Kosovës, Agron Llugaliu, prezantoi reformat dhe progresin e Kosovës në Konferencën e Tretë të Nivelit të Lartë të Drejtorëve të Përgjithshëm të Doganave të Ballkanit Perëndimor dhe Shteteve Anëtare të Bashkimit Evropian, të mbajtur në Athinë. Llugaliu ishte panelist në sesionin e posaçëm për Korsitë e Gjelbra.
Gjatë këtij diskutimi, Llugaliu theksoi se bashkëpunimi doganor në rajon ka kaluar nga harmonizimi rregullativ në zbatim konkret operacional. Sipas tij, integrimet rajonale të deritanishme kanë sjellë rezultate të prekshme në përshpejtimin e lëvizjes së mallrave, reduktimin e kohës së pritjes në kufi dhe rritjen e efikasitetit të procedurave doganore sipas standardeve evropiane.
Për të mbështetur më tej integrimin evropian dhe lehtësimin e tregtisë, ai nënvizoi se digjitalizimi duhet të shoqërohet me investime në infrastrukturën fizike. Ai vuri theksin te programet e Tregtarëve të Besuar (AEO), të cilat i cilësoi si një "pasaportë ekonomike" për bizneset, si dhe te zgjerimi i shkëmbimit të të dhënave nga SEED në SEED+.
Llugaliu trajtoi edhe nevojën për anëtarësimin e Kosovës në Konventën e Tranzitit të Përbashkët (NCTS). Ai theksoi se ky është një proces tërësisht teknik dhe jopolitik, i cili do të eliminonte barrierat administrative, do të shmangte fragmentimin rajonal dhe do të lehtësonte shkëmbimet tregtare ndërmjet Kosovës dhe vendeve të Bashkimit Evropian.
Së fundmi, Llugaliu prezantoi reformat e viteve të fundit si fillimi i procedurave të zhdoganimit në Portin e Durrësit nga viti 2022, shtetëzimi i terminaleve doganore dhe zbatimi i sistemit të deklarimit para-mbërritjes. Këto masa kanë ndikuar drejtpërdrejt në uljen e kostove operative dhe kursimin e kohës për komunitetin e biznesit.
Burim: Telegrafi
— Redaksia ZHURMA