Dogana e Durrësit gjobit me 5.1 milionë euro kompaninë Salillari

Dogana e Durrësit ka ndëshkuar kompaninë Salillari me një shumë totale prej 468 milionë lekësh, ose 5.15 milionë eurosh, për shmangie taksash gjatë importimit të mbi 1.32 milionë kilogramëve karburant. Përmes vendimit Nr. 626, autoritetet doganore konstatuan borxhin pasi biznesi deklaroi karburantin nën regjimin e përjashtimit taksues pa respektuar procedurat ligjore.

Sipas të dhënave zyrtare të hetimit të zhvilluar në Sektorin e Porto Romanos, kompania dispononte autorizimin Nr. 14695. Kjo leje i lejonte asaj të fute me regjim të përjashtuar nga TVSH-ja, akciza dhe taksat e tjera doganore vetëm materialet që i shërbenin ndërtimit të Bazës Ajrore të NATO-s në Kuçovë. Mirëpo, verifikimet e kryera në sistemin kompjuterik Asycuda dhe kontrollet në terren zbuluan mungesën e dokumentacionit të nevojshëm për sasinë e naftës.

Audituesit konstatuan se për 1.3 milionë kg naftë të llojit «diesel» 10ppm nuk kishte asnjë kërkesë të miratuar nga Agjencia e Mbështetjes dhe Prokurimit të NATO-s (NSPA). Për këtë arsye, autoritetet e trajtuan karburantin e zhdoganuar si «mall në qarkullim të lirë», duke e konsideruar përfshirjen e tij në regjimin e përjashtimit si të pasaktë.

Llogaritja e detyrimit të papaguar arriti fillimisht në 156 milionë lekë, ku përfshiheshin 60.4 milionë lekë akcizë, 48 milionë lekë TVSH, 42.7 milionë lekë taksë qarkullimi si dhe 4.7 milionë lekë taksë karboni. Rastit i është aplikuar Neni 252 për mosrespektim afatesh e procedurash, duke e cilësuar si kundërvajtje administrative nga neglizhenca. Kjo sjellje u penalizua me dyfishin e shumës së papaguar, që kap vlerën e 312 milionë lekëve gjobë.

Gjatë ankimimeve administrative, përfaqësuesit e kompanisë refuzuan ta firmosnin procesverbalin e autoriteteve. Ndërmarrja pretendoi se procedurat e ndjekura ishin të pavlefshme pasi lënda e importuar mbrohej nga marrëveshja kuadër që Shqipëria ka nënshkruar me NATO-n, por ky argument u rrëzua nga Dogana.