Ibrahimaj: Skema e re e pensioneve do të finalizohet në vitin 2027

Ministrja e Ekonomisë dhe Inovacionit, Delina Ibrahimaj, deklaroi se skema e re e pensioneve do të finalizohet gjatë vitit 2027 dhe do të fillojë të materializohet nga fillimi i vitit 2028, mbështetur në një buxhet prej 42 miliardë lekë ku 70% e tij shkon për sigurimet shoqërore. Gjatë një interviste në emisionin «Portofol» me gazetaren Eliza Gjediku në Report Tv, ministrja shpjegoi se politika e re fiskale synon rishpërndajen e rritjes ekonomike dhe përfshin masa konkrete për shtresat në nevojë.

Politikat e reja ekonomike parashikojnë gjithashtu rritjen e punësimit për të rinjtë dhe zbatimin e një programi të ri strehimi për t'i ardhur në ndihmë familjeve të reja. Sipas ministres Ibrahimaj, fokusi kryesor i vitit 2027 do të mbetet te pensionistët, ndërsa prioritet për vitin 2026 do të jetë kontrolli i rreptë i tregjeve ushqimore dhe i hidrokarbureve.

Në detajet e prezantuara për buxhetin, Ibrahimaj theksoi se bonuset mujore për pensionistët do të dyfishohen që nga 1 janari. «Në vitin 2027 ne do të dyfishojmë bonus mujor siç kishim premtuar me qëllim që të ardhurat e pensionistëve të shkojnë drejt atyre tavaneve që ne kishim përcaktuar», u shpreh ajo, duke shtuar se personat me vite të plota pune dhe pension nën 40.000 lekë do të marrin 36.000 lekë në muaj. Më tej, indeksimi i ardhshëm do të zhvendoset në muajin prill me një kosto totale prej 4 miliardë lekësh për buxhetin e shtetit. Lidhur me tregun, ministrja përmendi se ulja e TVSH-së për ushqimet bazë nga 20% në 6% duhet të sjellë një reduktim prej 11-12% në çmime, ndërsa garantoi se do të ketë monitorim të vazhdueshëm për të shmangur çdo lloj spekulimi. Sa i takket taksave, Ibrahimaj njoftoi se TVSH-ja standarde do të rritet nga 20 në 21%, ndërsa në nisje të vitit do të ndryshojë formula e tatimit mbi të ardhurat, duke vendosur një normë prej 30% për pagat mbi 700 mijë lekë në muaj dhe zgjeruar pragu i taksimit 13% për pagat nga 60 mijë deri në 300 mijë lekë.

Seanca e radhës për finalizimin e skemës së re të pensioneve pritet të konkretizohet gjatë vitit 2027, ndërsa zbatimi i masave të reja fiskale dhe buxhetore do të shtrihet përgjatë periudhës së viteve 2026 dhe 2028.

Në lidhje me mbështetjen e profesionistëve, Ibrahimaj u shpreh se «Edhe politika e rritjes së tavanit të pagesës së tatimit 23% mbi të ardhurat është një politikë e cila synon të mbështesë shtresën e mesme të profesionistëve ato të cilët në fakt duhet të kenë më shumë të ardhura në dispozicion pasi janë shtresa e cila garanton edhe një lloj specializimi në tregun e punës».