Cilat dështime në diplomaci i faturon Muhamet Hamiti kryeministrit Albin Kurti?

PRISHTINË — Profesor Muhamet Hamiti ka numëruar pesë dështime të mëdha të politikës së jashtme të Kosovës nën drejtimin e Albin Kurtit. Sipas tij, që nga viti 2021, kur Lëvizja Vetëvendosje mori pushtetin, orientimi strategjik për integrime euro-atlantike, i nisur nga Presidenti Ibrahim Rugova, ka pësuar devijime dhe dështime të njëpasnjëshme diplomacie.

Dështimi i parë, sipas Hamitit, lidhet me marrëveshjen e shkurt-marsit të vitit 2023 me Serbinë. Ai thotë se Kurti pranoi vetëmenaxhim për serbët, që sipas ekspertëve kushtetues përbën autonomi politiko-territoriale dhe bie ndesh me Kushtetutën. Emisari i BE-së, Peter Sorensen, i ka kujtuar së fundmi qeverisë se kjo marrëveshje mbetet e pranuar.

Më tej, Hamiti përmend sanksionet financiare të Bashkimit Evropian, të cilat filluan në qershor 2023 dhe zgjatën deri në fillim të vitit 2026. Si pasojë e politikave të qeverisë, Kosovës iu pezulluan rreth 700 milionë euro të destinuara për projekte jetike, duke dëmtuar drejtpërdrejt ekonominë dhe mirëqenien e qytetarëve në vend.

Si dështim të tretë ai rendit pamundësinë e anëtarësimit të Kosovës në Këshillin e Evropës në vitin 2024, një proces që konsiderohej gati i përfunduar. Ky bllokim la qytetarët jashtë mekanizmave evropianë për mbrojtjen e të drejtave të njeriut dhe shënoi një hap prapa për subjektivitetin ndërkombëtar të shtetit.

Hamiti vë në pah edhe vendimin e Shteteve të Bashkuara të Amerikës në shtator të vitit 2025 për të pezulluar dialogun e planifikuar strategjik. Ambasada e SHBA-së në Prishtinë pati deklaruar se veprimet e qeverisë kanë rritur tensionet dhe paqëndrueshmërinë, duke kufizuar bashkëpunimin produktiv me aleatin kryesor të vendit tonë.

Së fundi, ai kritikon refuzimin që qeveria i bëri që nga viti 2021 projektit amerikan për gazin e lëngshëm (LNG). Ky vendim ka dëmtuar mundësinë për të ulur varësinë energjetike të Kosovës dhe për të rritur sigurinë nacionale, duke e lënë vendin më larg integrimit euro-atlantik se para pesë vitesh.

Burim: Demokracia
— Redaksia ZHURMA